Ээлжээтэ амжалтанууд

Анха түрүүшынхиеэ Ород гүрэн дотор мэргэжэлтэ барилдаанай лигэ нээгдэһэн байна. Эмхидхэгшэдэй һанамжаар, лигэдэ мэдээжэ түрүү тамиршад хабаадажа, хэдэн шатын удаа түрүүшүүлые элирүүлхэ.

Ерээдүйдэ барилдаагаар элитэ хэмжээ ябуулгануудай нэгэн болохо эхин шата майн 19-20-ой үдэрнүүдтэ Москва хотодо үнгэргэгдэбэ. Грэмпплинг, панкратион, эрэшүүлэй болон эхэнэрнүүдэй дунда барилдаагаар 15 хибэс дээрэ 600 гаран хүн мүрысөө. Хажуугаарнь эдиршүүл наһанай гурбан бүлэгтэ уулзажа, эрхимүүдые тодоруулаа. Эндэ 1 мянга гаран үхибүүд хибэс дээрэ гараа.

Буряадай тамиршад ялас гэмэ амжалта туйлаа гэхэдэ, алдуу болохогүй. Эхэнэрнүүдэй дунда тэмсээндэ Ирина Ологонова 55 килограммай шэгнүүртэ дүрбэн уулзалгада илалта туйлажа, чемпионой нэрэ зэргэдэ хүртөө. Шангай 2-дохи һууринуудые Вероника Чумикова болон Жаргалма Цыремпилова эзэлээ. Хүрэл медальнуудые Жаргал Дамдинов болон Ульяна Тукуренова гэгшэд абажа шадаа.

Монгол гүрэнэй тамиршад заншалта ёһоороо һайн дүнгүүдые харуулһан байна. Эрэшүүлынь хоёр мүнгэн медаляар шагнагдаа. Монголой басагад хоёр дахин чемпионой нэрэ зэргэдэ хүртөө.

Эдиршүүлэй дунда тулалдаануудта Буряадай үхибүүд дүрбэ дахин түрүүшүүлэй тоодо оролсоо. 2008-2009 онуудта түрэһэн хүбүүдэй дунда Тумэн-Жаргал Ешонов (зураг дээрэ) чемпион боложо тодороо. “Зугалай” гэһэн спортын клубай гэшүүн Краснодарска хизаарай, Белгородско можын, Москва хотын болон Московско можын тамиршадые шүүжэ гараа.

Үшөө нэгэ түрүү һуури Дарья Татарова эзэлээ. 2010-2011 ондо түрэһэн басагадай дунда барилдаһан тамиршан Краснодарска хизаарай түлөөлэгшын нюргыень шоройдуулаа.

Аха дүү Кирилл, Алексей Дульский хоёр мүнгэн болон хүрэл медальнуудаар шагнагдаа.

“Poddubny Wrestling League” (PWL) гэһэн барилдаанай лигын ээлжээтэ мүрысөөн июниин 20-до Омск хотодо болохоор хараалагдана.