​Заншалта урилдаан

Анха түрүүшынхиеэ “Российский азимут” 2006 ондо эмхидхэгдээ бэлэй. Тэрэ гэһээр жэл бүри энэ мүрысөөндэ хэдэн сая тамиршад хабаадана гээшэ. “Лыжня России”, “Кросс наций” гэһэн түсэлнүүдтэй адли гүрэн дотороо эгээл олоор спортдо дуратайшуулые суглуулна ха юм.

Буряад Улас тус хэмжээ ябуулгада 2007 онһоо оролсоһон байна. Заншалта ёһоороо май һарын һүүл багаар эмхидхэгдэдэг мүрысөөн Улаан-Үдын олон талмай дээрэ болоһон түүхэтэй. Ипподромой, Этнографическа музейн, Дээдэ Онгостойн, “Зорька” лагериин талмайнуудта хэмжээн үнгэргэгдэһэн юм. Мүнөө жэлдэ урилдаан “Снежинка” гэһэн санаар болон биатлоноор урилдаанай комплексын дэргэдэ болоо.  

Буряад Уласай Шэг зүг бэдэрэлгын федерациин хүтэлбэрилэгшэ Евгений Осиповой хэлэһээр, наһанай найман бүлэгтэ хабаадагшад мүрысөө. Бүхы дээрээ 600 гаран хүн урилдаанда оролсоо.

Мүрысөөнэй удаа “Спортивный лабиринт” гэһэн нааданда олон дуратайшуул хабаадажа, шэг зүг бэдэрэлгын азатай танилсаа.

Хэмжээ ябуулгын эгээл шанга бүлгэмдэ түрүүлһэн Улаан-Үдын Василий Гордеев Сэлэнгын аймагай Сурэна Банзаракцаева хоёр гол шангуудта хүртөө.

Шэг зүг бэдэрэлгээр Буряад Уласта олон тоото мүрысөөнүүд үнгэргэгдэнэ. Кубогта хүртэхын түлөө мүрысөөн 10 гаран шатаһаа бүридэжэ, хэдэн аймагуудта эмхидхэгдэнэ. Уласай хүдөөгэй үбэлэй болон зунай спортын наадануудай программада оруулагданхай.