Нааданууд үргэлжэлһөөр

Футбол. Буряадай команданууд бүхэроссиин мүрысөөнүүдтэ яһала һайн үрэ дүнтэйгөөр хабаадажа байна. Һайн дуратанай командануудай дунда Ородой чемпионадта “Бурятия” наадана гээд һануулая. 3-дахи лигын “Сибирь болон Алас Дурна” бүлгэмдэ ээлжээтэ наадануудаа Буряадай футболистнууд Алтайн хизаарта үнгэргэбэ.

“Бурятия” болон “Полимер” гэгшэ командануудай наада Барнаул хотодо харахаяа сугларһан арад зон нэгэшье гоол харангүй тараба. Рубцовск хотодо “Торпедо” командатай айлшад мүн лэ ана-мана тулалдаба. Тус наадан 2:2 гэһэн тоотойгоор түгэсөө. Буряадай командын түлөө Алексей Рябованов ба Павел Синаторов гэгшэд бүмбэгэнүүдые талмайн эзэдэй бартаа руу сохижо оруулаа.

Табан турай удаа “Бурятия” команда 5 очко абаад, 10-дахи һуури эзэлнэ. Мүрысөөндэ Бийск хотын “Строитель” команда түрүү һуурида ябана. Тэдэ 13 очкотой юм. “Новосибирск-М”, “Темп” команданууд удаадахи һууринуудта гаранхай.

Удаадахи зургаан наадаяа “Бурятия” команда өөрын талмай дээрэ үнгэргэхэ. Июниин 3-да Барнаулай “Алтай” команда Улаан-Үдэ айлшаар бууха.

Эдиршүүлэй футбольно лигэдэ нааданууд үргэлжэлһөөр. Урдахи долоон хоногто Буряадай футболистнууд Якутск хотын наадагшадые шүүжэ шадаа. 2007 оной наадагшад айлшадые 3:1 гэһэн тоотойгоор илажа гараад, мүрысөөнэй таблицада 1-дэхи һуури эзэлнэ. 2006 ондо түрэһэн хүбүүд Саха-Яхад Уласай түлөөлэгшэдые 5:1 гэһэн тоотойгоор шүүһэн байна. Энэ бүлэгтэ аяар табан команда адли 6 очко абанхай. “Бурятия” команда 5-дахи һуурида ябана.

Майн 28-да Буряадай эдиршүүл ээлжээтэ наадануудаа үнгэргэхэ юм. Айлшаар Шэтэ хотын эдиршүүл бууха. Һүүлдэнь тэдэ Владивосток, Южно-Сахалинск наадахаяа ошохо юм.