​Тамирай тобшо һонинууд

Футбол

Новосибирск. 13 наһа хүрөөгүй басагадай дунда Сибирь болон Алас Дурна зүгэй мүрысөөндэ Буряадай команда шангай 2-дохи һуури эзэлээ. Командын бүридэлдэ Сэлэнгын, Хяагтын аймагуудай, Улаан-Үдэ хотын наадагшад оруулагдаа. Буряадай командын гэшүүн Анастасия Зимирева “Мүрысөөнэй эрхим добтологшо” гэһэн нэрэ зэргэдэ хүртөө.

Владивосток. Эдиршүүлэй футбольно лигэдэ Буряадай хоёр команда хабаадалсана. Алас Дурна зүгэй түлөөлэгшэдэй дунда тэдэ наадана. Владивосток хотын КСШОР командатай Буряадай эдиршүүл ээлжээтэ наадануудаа үнгэргөө. 2007 оной хүбүүд 2:1 гэһэн тоотойгоор илалта туйлаа, мүн 2006 оной тамиршад 0:3 гэһэн тоотойгоор шүүгдээ.

Мүрысөөнэй таблицада Буряадай наадагшад 4-дэхи һуури эзэлнэ.

 

Улаан-Үдэ. Һайн дуратанай командануудай дунда мүрысөөн үргэлжэлһөөр. Июниин 3-да болон 5-да “Бурятия” команда Алтайн хизаарай айлшадые угтан абаа. Барнаулай “Алтай” командые тэдэ 7:0 гэһэн тоотойгоор шүүгээ. Бийск хотын “Строитель” командатай 1:1 тоотойгоор ана-мана наадажа тэнсээ.

Мүнөө үедэ “Бурятия” команда 7-дохи һуури эзэлнэ. Ерэхэ амаралтын үдэрнүүдтэ Эрхүү хотын “Байкал”, “Иркутск” командануудтай Улаан-Үдэдэ уулзаха.

 

Шатар

Кострома. 9 наһа хүрөөгүй шатаршадай дунда Ородой чемпионат һаяхана түгэсэбэ. Буряад Уласые хоёр наадагшад түлөөлөө.

153 хабаадагшадай дунда Сэлмэг Тучинова 9-дэхи һуури эзэлээ. 11 уулзалгада тэрэ 8 оноо  абажа шадаа. Түрүү һууринуудые эзэлһэн шатаршадһаа оройдоол 1 оноогоор үлөө.

Дмитрий Дашинимаев 6 очкотойгоор мүрысөөгөө түгэсөө.

 

Барилдаан

Уфа (Башкортостан Улас). Ородой һурагшадай Спартакиадын бүридэлдэ тамирай 47  зүйл оруулагданхай. Үнгэрһэн амаралтын үдэрнүүдтэ барилдаагаар мүрысөөнэй финальна шата эмхидхэгдээ. Эндэ Буряадай тамиршад зургаан медальда хүртөө.

36 килограмм хүрэтэр шэгнүүртэ Ирина Цыдеева чемпионой нэрэ зэргэдэ хүртөө. Буряадай эдиршүүл үшөө табан хүрэл медаль абажа шадаа.

 

Алматы (Казахстан). “Болат Турлыхановай Кубок” гэһэн уласхоорондын мүрысөөн июниин 5-да түгэсөө. Һүүлшын үдэртэ Буряадай барилдаашан Арсалан Будажапов хибэс дээрэ гараа. Олон жэлдэ Кыргызстанай түлөө барилдадаг тамиршан энэ удаа шангай һуурида гаража шадаагүй, 79 килограммай шэгнүүртэ 5-дахи һуури эзэлээ.

 

Даам наадалга

Сочи. Ород гүрэнэй Кубогта хүртэхын түлөө мүрысөөндэ эгээл эрхим наадагшад суглараа. Буряад Уласай Баир Ринчиновэй эрхимүүдэй тоодо оролсоһониинь баярламаар. Тус мүрысөөндэ тэрэ 8-дахи һуурида гараа.