Абаргын аха-өөрөө абарга

Һур харбалгын мүрысөөндэ 153 хүн хабаадаа. Түрүүшын шатада тэдэ 16 дахин харбажа, эхэнэрнүүдэй, эрэшүүлэй, үндэр наһатайшуулай дунда эрхимүүдые элирүүлээ. Энэ шатын дүнгөөр командна тоосоон онсологдоо. Эндэ шалгарһан 64 харбаашад абсолютна чемпион болохын түлөө мүрысөөндэ хабаадаһан байна.

Эрэшүүлэй дунда Батожаргал Батоев (Октябрьска район) түрүү һуурида гараа. Эхэнэрнүүдэй дунда Түнхэнэй аймагай түлөөлэгшэ Надежда Харитонова алтан медаляар шагнагдаба. Аха заха тамиршадай дунда Сэлэнгын  аймагай 74 наһатай Сергей Тапхаров эгээл эрхим дүн харуулаа. 82 наһатай мэдээжэ харбаашан Цырен-Доржо Магаков 2-дохи һуурида гаража баярлаа. Командна тоосоондо Түнхэнэй аймагай команда чемпион болоһон байна.

Абарга болохын түлөө 64 харбаашад тэмсээ. Шата бүхэнэй удаа энэ тоо хоёр дахин бага болоно. Тиигэһээр азатай дүрбэн хүн финалда орожо шадаа. Эдэ хэд бэ гэбэл, Захааминай суута харбагшад болохо  Цыремпиловтэнэй Бэлигто, Түнхэнэй аймагай Надежда Харитонова, Зэдын аймагай Виктор Ринчинов болон Хэжэнгын аймагай Бато Тугалханов гэгшэд болоно.

Һүүлэй үедэ эхэнэрнүүд олон дабаа гаталжа, эрэшүүлээр адли тэмсэнэ. Эндэ  Виктория Будаева, Сэсэг Доржиева гэгшэдые нэрлэмээр. Сэсэг хадаа финалда шүүхэ аргатай  байгаа. 1-дэхи һууриин түлөө нэмэлтэ годли буулгаһанай удаа тэрэ диилдээ һэн гээд һануулая. Энэ удаа Надежда Харитонова һайнаар харбаа гэхэдэ, алдуу болохогүй. Тэрэ нэгэ дахин ласти тудаа. Хэды тиигэбэшье мэргэнээр харбаһан Виктор Ринчиновые хүсэжэ шадаагүй.

Финалда Виктор Бадмацыренович 12 очко абажа, абарга болоо. Бэлигто Цыремпилов 11 оноотойгоор мүрысөө түгэсхөө.

Виктор Ринчинов олон жэлдэ һур харбагшадые һорино. Түрэл нютагтаа һургуулиин  захиралаар хүдэлбэшье, дуратай ажал хэрэгээ орхёогүй. Мэргэн дүү хүбүүнэйнгээ харбажа һурахамни гэхэдэнь, ехэ гайхаа һэн. Юуб гэхэдэ, тэрэ яһала наһатай болошоод байгаа.

- Мэргэндээ түрүүшын алхамуудтань туһалһан байнаб. Өөрөө хорёо соогоо бүхы сүлөө сагтаа харбажа байгша һэн. 2017 ондо уласай Сурхарбаанда абарга боложо, олон тоото аха дүүнэрээ баярлуулаа һэн. Би өөрөө хэзээб даа абарга болохоб гэһэн бодол досоомни ябаа ёһотой. Һорилгонуудаа алдангүй, бэлэдхэл хэжэ байгааб. Олон мүрысөөнүүдтэ хабаадажа, бэлиг шадабарияа мүлижэ, бэеэ бэлдээб. Тиигэжэ мүнөөдэр шүүһэндээ, тон баяртайб, - гэжэ Виктор Ринчинов хөөрэнэ.

“Наадан-Сурхарбаанай” һур харбалгада тамиршан бүхэн һайн бэлэдхэл гаража, түрүүлхэ аргатай. Мүнөө жэл энээниие 60 наһатай Виктор Ринчинов гэршэлбэ гээшэ.