Бурхандаа зальбараад лэ...

- Бүгэдэ буряад угсаатанай “Алтаргана” нааданда шэлэн абалгын шата мүнөөдэрэймнай хэмжээ ябуулга боложо үгөө. Тиимэһээ эхэнэрнүүдэй дунда тэмсээ эмхидхээгүйбди. Бүхы дээрээ 120 гаран хүн хабаадалсаа, - гэжэ мүрысөөнэй ахамад шүүгшэ Гомбо Зурбаков хэлэнэ.

Абарга болохын түлөө гол шатада оройдоол табаниинь орохо аргатай байгаа. Финалда ороһон табан шанга хүбүүд үдэрэй хугасаада 14 дабаа гаталһан байна.

Һүүлшын шатада Захааминай аймагай гурбан түлөөлэгшэ, Баргажанай болон Хэжэнгын аймагуудай нэгэ-нэгэ тамиршан хабаадаһан байна. Аяар холын Монголһоо асарагдаһан тэмээнэй һээрнүүдые хухалхыень тэдээндэ дурадхагдаа. Түрүүшын гурбан һээр булта жэншэдгүй эбдэжэ шадаа. Удаадахи һээр Хэжэнгын бүхэ диилэбэгүй, удаань Баргажанай болон Захааминай тамиршад һалаа. Закаменск хотын хүдөө ажахын һалбариин колледжын 17 наһатай оюутан Дмитрий Крылов, энэл аймагай Шара-Азарга һууринай 24 наһатай үмсын хэрэг ябуулагша Хэшэгтэ Раднаев гэгшэдэй хоюулаа үлэхэдэнь, эмхидхэгшэд шэнэ гурим дурадхаа.

- Табан һээр алдангүй хухалагдаа. Саашадаа иимэ эрхимээр эбдэбэл, үглөөгүүршье болотор мүрысэхэ байгаа. Мүн һээрнүүдшье үсөөн болоо. Эдээниие хараалан, гурбан һээр хэн эгээл түргөөр хухалнаб, тэрэ шүүхэ гэһэн гурим табяабди. Энэмнай шэнэ юумэн бэшэ, элдэб мүрысөөнүүдтэ хэрэглэгдэһэн байха, - гэжэ ахамад шүүгшын туһалагша Хэшэгто Батомункуев мэдүүлнэ.

Залуу бүхэ гурбанай хоёр лэ һээр эбдээ. Хэшэгтэ Раднаев гурбуулыень хухалжа шадаад, нюураараа доошоо хараад, стадионой ногоон дээрэ унашоо. Нюдэнһөөнь баярай нёлбоһон гоожожо байхань харагдаа.

Хэшэгтэ Раднаев 18 наһатайһаа һээр хухалжа эхилээ. Тэрэ гэһээр олон тоото мүрысөөнүүдтэ хабаадажа, хэдэн дахин шангай һуури эзэлээ. Оройдоол нэгэ тэмсээндэ илажа гараһан намтартай.  

- Мүнөөдэр буянтай үдэр болобо гээшэ. Һээр бүхэниие хухалхынгаа урда Захааминайнгай хада бурхадта мүргөөб, минии зальбарал тэдэ дуулабал даа. Мүрысөөндэ шанга хүбүүд оролсоо, тэдэниие шүүжэ гараһамни, ехэ сэнтэй, - гэжэ Хэшэгтэ Раднаев баяраараа хубаалдана.