Гансахан эхэнэр эрхимлээ

Үбэр Байгалай хизаарай Агын тойрогой Дулдаргын  аймагай Үзөөн нютагһаа уг гарбалтай Дарима балшар бага наһанһаа шагай наадантай танил юм. Аха захатанай наадахые анхаралтайгаар хаража, бүхы азануудые бэедээ бэлэнээр шэнгээжэ абаа. Залуу басаган 2018 ондо аймагай Соёлой байшанай дэргэдэ хүдэлдэг шагай наадагшадай бүлгэмдэ орожо, эхинһээнь түрүүшүүлэй тоодо оролсоо. Олон грамота, медальнууд дээрэ хэлэгдэһэниие гэршэлнэ.

 Мүнөө үедэ Дарима Энэбэшиева Улаан-Үдэдэ ажаһууна, уласай “Наадан-Сурхарбаанда” Советскэ райониие түлөөлөө.

-Иимэ томо мүрысөөндэ анха түрүүшынхиеэ хабаадаһаар лэ, абарга болоһондоо баяртайб. Абаһан гоё кубок гэртээ эгээл һайн газарта табяад байхаб. Иигээд лэ “Алтарганада” хабаадаха түсэбтэйб, - гэжэ абарга боложо тодорһон Дарима Энэбэшиева хөөрэнэ.

Мүрысөөндэ 15 аймагай түлөөлэгшэд хабаадаһан байна. Няһалалгада Батор Урбазаев түрүүлээ. Мори урилдаанда Эрдэни Дари Доржиевае хэншье булижа шадаагүй. Шүүрэлгэдэ Гарма-Ханда Бадмаева алтан медаль абаа.

Һонирхолтой гэхэдэ, буряад шагай нааданда ондоо яһатанай шалгархада баярламаар. “Мори урилдаан” гэһэн шэглэлээр Байгал шадарай аймагай Татьяна Богданова шангай 2-дохи һуури эзэлжэ, мүнгэн медаляар шагнагдаа.

-Манай нютагай Юрий Теслев элдэб зүйлнүүдээр мүрысөөнүүдые эмхидхэдэг заншалтай. Үндэр наһатай маанадаа хүхеэжэ, басагад гэдэг. Нэгэ дахин ямар бэ даа яһануудые асараад, наадая гээ. Дүримтэйнь танилсажа, ехэ һонирхожо наадаабди. Намда ехэ һайшаагдаа. Шүүрэлгэдэ яһануудаа дээшэнь шэдээд, буруу гараараа барижархидагби, заримдаа  хажуу тээшэнь унагаадагби. Мори урилдаанда яһала һайн гарааб. Түрүүшынгээ “Наадан-Сурхарбаанда” түрүүлжэ гараа һэм. Удаадахи жэлдэнь доошоо унааб, шангай һуури эзэлжэ шадаагүйб. Пандемиин үедэ яһала һайн бэлэдхэл хэжэ, 2-дохи һуури эзэлээб, - гэжэ Татьяна Богданова һонирхол татамаар мэдүүлнэ.

Тамиршанай хэлэһээр, шагай наадан хүгжэжэ байна. Сурхарбаанай үедэ олон танилнуудаараа уулзаа. Мүн залуушуулай олоор хабаадажа байһыень тэрэ обёороо.