Залуу халаан түрүүлээ

Сэнгдоржо хадаа үнинэй буряад шатараар мүрысөөнүүдтэ хабаадана. Тэрэ олон дахин түрүү һуури эзэлээ, шангайшье һуурида гарана. Харин мүнөө анха түрүүшынхиеэ Сурхарбаанай нааданда абарга болоһон байна.

Нэн түрүүн  эрэшүүлэй дунда Сэнгдоржо 8,5 оноо  абаад, түрүүлээ. 8 оноотой Дмитрий Пушкарев, 7,5 оноотой Жамсаран Цыдыпов гэгшэдые хойноо үлөөгөө. Абарга болохын түлөө тэрэ эхэнэрнүүдэй дунда 2-дохи һуури эзэлһэн Сойжина Комиссаровае диилээд, һүүлшын шатада Дмитрий Пушкаревые илажа гараа.

Эхэнэрнүүдэй дунда эдир шатаршад түрүү һууринуудта гараһан байна. Дарима Саргаева 8,5 оноо абажа, 1-дэхи һуури эзэлээ. 2-дохи һуурида гараһан Сойжина Комиссарова 8 оноотой мүрысөөгөө түгэсхөө. Номина Дармаева хүрэл медаляар шагнагдаа. Буряад шатарай ерээдүй гэжэ дэмы нэрлэгдээгүй эдэ гурбан шатаршад мэдээжэ наадагша, эхэнэрнүүдэй дунда уласхоорондын гроссмейстер Инна Ивахиновагай ударидалга доро бэлэдхэл хэнэ гээд хэлэхэ хэрэгтэй.

Командна тоосоондо Железнодорожно, Ивалгын ба Октябрьска аймагуудай түлөөлэгшэд шалгараа.