Хүсэд хүсэндөө бэшэшье һаа

21-дэхи зуун жэлдэ Буряадай барилдаашад Ородой чемпионадуудта ехэнхидээ нэгэл медаль абадаг байна. Нёдондо мүрысөөнэй Улаан-Үдэдэ болоходонь, манай түлөөлэгшэд гурбан шангай һуури эзэлээ. Буряадай Барилдаанай федерациин хүтэлбэрилэгшын орлогшо Жамса Лхамажаповай тэмдэглэһээр, барилдаашаднай өөрын хүсэн соо дүн харуулаа.

Тус хэмжээ ябуулгада Буряадай 21 хүн хибэс дээрэ гараа. Балдан Цыжипов 125 килограмм хүрэтэр шэгнүүртэ барилдаа. Тыва, Саха-Яхад, Дагестан Уласуудай түлөөлэгшэдые илажа, хахад финалай шатада гаража шадаа. Хойто Осети-Алани Уласай залуу барилдаашан Ален Хубуловта Балдан диилдэжэ, түрүү һуури эзэлхэ арга боломжоёо алдаа. Ород гүрэнэй хоёр дахин чемпион Алан Хугаевтай уулзахадаа, Буряадай барилдаашан бүхы арга шадалаа гаргажа, хүрэл медаляар шагнагдаа.

- Би үбдэгөө гэмтээгээд, удаан эмнэлгэ гарааб. Һайнаар аргалуулжа, мүрысөөндэ бэлдэжэ үрдеэгүйб. Хэды тиигэбэшье 3-дахи һуури эзэлһэндээ баяртайб. Теэд бүри дээшээ гараха аргатай байгааб, - гэжэ Балдан Цыжипов мэдүүлнэ.

61 килограммай шэгнүүртэ Буряадай хоёр тамиршад хүрэл медаль абахын түлөө уулзалгада хабаадаа. Алдар Бальжинимаев  Жаргал Дамдинов хоёр шүүгдэжэ, 5-дахи һууринуудта гараа. Бусад барилдаашад нэгэ-хоёр уулзалгануудые үнгэргөөд диилдээ.

2021 ондо Улаан-Үдэдэ болоһон Ородой чемпионадта түрүүлһэн зургаан тамиршан дахинаа амжалтаяа дабтажа шадаа. Олимпиин наадануудай абарга Завур Угуев 57 килограммай шэгнүүртэ 5-дахияа Ородой чемпионой нэрэ зэргэдэ хүртэбэ.

- Энэ чемпионадта шангай һуури эзэлһэн бүхы барилдаашад удангүй Сочидо бэлэдхэл гарахаяа ошохонь. Хоёр долоон хоногой хугасаада һорилго ябуулагдаха. Июль һарын һүүл багаар, августын эхиндэ 21 үдэр соо баһа бэлэдхэл хэгдэхэ. Юуб гэхэдэ, намарай үдэрнүүдтэ Сербидэ болохо дэлхэйн чемпионадта хабаадахабди гэжэ ехэл найданабди. Август һарада Казань хотодо Ородой арадуудай Спартакиада үнгэргэгдэхөөр хараалагдана. Манай түрүү тамиршад тэндэ барилдаха гэжэ түсэблэнэ, - гэжэ Ородой суглуулагдамал командын ахамад һоригшо Дзамболат Тедеев мүрысөөнэй дүнгүүдые согсолходоо хэлэбэ.