Хурдан хүлэгүүд хужарлуулаа

Урилдаа харахаяа хэзээ хэзээнэйхиһээ олон хүн суглараа. Энэнь ойлгостой, һүүлэй хоёр жэлдэ мори урилдаанай мүрысөөнүүд болоогүй байгаа. Бүхы сугларагшадта һонирхолтой соёлой программа дурадхагдаа. Ивалгын аймагай уран һайханай бүлгэмүүд һайхан дуу хатараа дэлгээ.

Хэмжээ ябуулга эмхидхэгшэдэй мэдүүлһээр, харагшадта аяар 10 зайда урилдаан дурадхагдаа. Урда жэлнүүдтэ 6 зайда  бологшо һэн. Тиимэһээ хабаадагшадай тоо дээшэлээ гээд хэлэлтэй. Бүхы дээрээ 84 хүлэг урилдаанда хабаадаа.

- Олон зоной  хабаадахын тула урилдаанай зайнуудые олошоруулаабди. Мори урилдаан тон ехээр хүгжэнэгүй гэжэ заримашуул буруу хэлэнэ. Бүхы дасан дугангуудай найр наадануудта, аймагуудай һайндэрнүүдтэ мори урилдаан үнгэргэгдэнэ, - гэжэ Буряад Уласай Засагай газарай хүтэлбэрилэгшын орлогшо Вячеслав Цыбикжапов мэдүүлнэ.

 Залуу хүлэгүүд түрүүшынгээ мүрысөөндэ хабаадажа, оройдоол 1200 метр зайда урилдаа. Мүн тиихэдэ буряад үүлтэрэй моридые 21 километр зайда табяа. Эгээл эндэ илалта туйлагша нааданай гол шанда хүртэхэ байгаа. Өөр өөрын зайда Мухар-Шэбэрэй, Бэшүүрэй, Зэдын аймагуудай хоёр-хоёр хүлэг, Сэлэнгын  аймагай 3 хүлэг, Хэжэнгын аймагай 1 хүлэг түрүүлжэ гараа.

Гол шанда Сэлэнгын аймагай “Браслет” гэжэ нэрэтэй хүлэг хүртөө. Эзэниинь Олег Санжиев болоно. Түрүү һуурида гарагшые Цырен Будаев жолоодоо гээд хэлэлтэй.