Эхи табигшые дурсан

Тус хэмжээ ябуулга зургаадахияа эмхидхэгдээ гээд хэлэлтэй. Мүнөө жэл 130 гаран тамиршад хабаадаа.

- Дурасхаалай мүрысөө анха түрүүшынхиеэ эмхидхэхэдэмнай олон можо хизаарнуудай даам наадагшад  ерээ һэн. Феликс Александрович ганса Буряад Уласта мэдээжэ бэшэ, мүн бүхы Россиин  регионуудаар хүндэтэй байгаа гээд энэ гэршэлээ. Даам наадалгын федераци манай мүрысөө бүхэроссиин хэмжээндэ гаргаһан байна. “Кубок Байкала” гэжэ нэрлэгдэһэн хэмжээндэмнай түрүү зэргын наадагшад заншалта ёһоороо хабаадана гээшэ. Энэшье удаа дэлхэйн чемпионууд, уласхоорондын гроссмейстернүүд хабаадаһаниинь һайшаалтай, - гэжэ Буряадай Даам наадалгын федерациин хүтэлбэрилэгшэ Олег Болсохоев мэдүүлнэ.

Феликс Завелинский Буряадта даам наадалгын эхи табигша гээд  суутай. Бэлдэһэн тамиршадынь үндэр амжалтануудые туйлаа бэлэй. Холын 1980-яад онуудаар Буряадай суглуулагдамал командын гэшүүд “Чудо-шашки” гэһэн бүхэсоюзна түсэлдэ хэдэн дахин амжалтануудые туйлаһан байна. Валентина Заяханова, Аюна Банзаракцаева, Валентина Ангархаева, Людмила Замбалаева болон бусад бүхэроссиин болон уласхоорондын хэмжээндэ түрүүшүүлэй тоодо оролсоо, дэлхэйн болон Европын мүрысөөнүүдтэ чемпионууд болоһон юм.

Классическа даам наадалгын мүрысөөн гурбан бүлэгтэ эмхидхэгдээ. Эрэшүүлэй дунда дэлхэйн чемпион, уласхоорондын гроссмейстер Николай Стручков түрүүлжэ гараа. Саха (Яхад) Уласай мэдээжэ наадагша 4-дэхи жэлээ 1-дэхи һуури эзэлбэ гээшэ. Эхэнэрнүүдэй дунда Оренбургын можын Анастасия Кригер Буряадай Людмила Замбалаева хоёр адли очкотой мүрысөөгөө түгэсхөө. Нэмэлтэ наадануудай удаа Анастасия чемпион гэжэ тодороо. 1-дэхи лигэдэ Красноярск хотын Пётр Павлов, Эрхүү можын Усть-Ордын тойрогой Ирина Харханова гэгшэд түрүүлжэ гараа.

Эдиршүүлэй дунда дэлхэйн абарга болоһон Усть-Ордын тойрогой гимназиин һурагша Василий Номогоев тус мүрысөөндэ 6-дахи һуури эзэлбэшье, спортын мастерай нэрэ зэргэдэ хүртэжэ шадаа.

Түргэн даам наадалгада Башкортостан Уласай уласхоорондын гроссмейстер Муродулло Амриллаев алтан медальда хүртөө. Буряадай Баир Ринчинов шангай 2-дохи һуури эзэлээ. Эхэнэрнүүдэй дунда Красноярск хотын Виктория Иванус түрүүлээ. Анастасия Кригер, Буряадай Ринчима Бадмацыренова гэгшэд шангай һууринуудта гараһан байна.