​Тамирай тобшо һонинууд

Гиир үргэлгэ

Бишкек (Кыргызстан Улас). Эдиршүүлэй дунда дэлхэйн чемпионадта Буряадай тамиршан Егор Козин шалгараа. Кабанскын аймагай түлөөлэгшэ шангай 3-дахи һуури эзэлээ.

 

Барилдаан

Якутск. Олимпиин наадануудай абарга болоһон Павел Пинигинэй нэрэмжэтэ бүхэроссиин мүрысөөндэ 15 наһа хүрөөдүй 600 гаран эдир тамиршад хабаадаһан байна. Улаан-Үдэ хотын “Зугаалай” гэһэн барилдаанай клубай гэшүүд гурбан медаль абажа шадаа.

32 килограммай шэгнүүртэ Руслан Шурапов алтан медальда хүртөө. Роман Гусев, Тумэн Ешонов гэгшэд шангай 3-дахи һууринуудые эзэлээ.

 

Һур харбалга

Таганрог.  Ород гүрэнэй һурагшадай Спартакиада үргэлжэлһөөр. Буряадаймнай һур харбагшад финальна шатада һайн дүнгүүдые харуулба гээшэ.

Командна микст тоосоондо Алина Зайганова, Александр Гонгоров гэгшэд түрүүлһэн байна. Хубиин тоосоондо Андрей Рычков 3-дахи һуурида гараа. Мүн хүбүүдэй суглуулагдамал команда хүрэл медаль абаа.

 

Хүнгэн атлетикэ

Брянск. Ородой Кубогта хүртэхын түлөө мүрысөөн “Королева российского спорта” гэһэн бүхэроссиин түсэлэй нэгэ шата боложо үгөө. Буряад Уласай Роман Троценко 1500 метрэй зайда шангай 2-дохи һуури эзэлээ.

 

Футбол

Комсомольск-на-Амуре. Ородой эдиршүүлэй футболой лигэдэ ээлжээтэ нааданууд үнгэргэгдэбэ. “Бурятия” гэһэн команда Хабаровска хизаарта эмхидхэгдэһэн  хоёр нааданда оролсоо. 2007 оной хүбүүд 3:0 гэһэн тоотойгоор талмайн эзэдые шүүһэн байна. 2006 оной хүбүүд 4:1 гэһэн тоотойгоор “СКОШ №2” командые илажа гараа.

Удаадахи наадануудаа тэдэ Благовещенск хотодо июлиин 9-дэ үнгэргэхэ.