Хүлеэгдэһэн амжалтанууд

Поддубнын нэрэмжэтэ барилдаанай лигэ

Ород гүрэнэй тамиршадые уласхоорондын мүрысөөнүүдтэ оруулхагүй гэһэн шиидхэбэри абтаһанай удаа Барилдаанай федераци шэнэ мүрысөө эмхидхэжэ эхилээ. Түүхэтэ барилдаашан Иван Поддубнын нэрэ тэмсээндэ үгтөө (Poddubny Wrestling League 2). Октябриин 13-14-эй үдэрнүүдтэ  2-дохи урилдаан Москва хотодо эмхидхэгдэбэ.

Май һарада болоһон энэ мүрысөөндэ Буряадай барилдаашад олоор хабаадаһан байна. Харин мүнөө ехэшүүлэй дунда ганса Ирина Ологонова барилдаа. Хабартаа тэрэ 55 килограммай шэгнүүртэ чемпион боложо тодороо һэн гээд һануулая.

Мүнөө Ирина 57 килограммай шэгнүүртэ оролсожо, шангай 3-дахи һуури эзэлжэ шадаа. Тус мүрысөөндэ Буряадай түрүү барилдааша басаган хоёр илалта туйлаа, нэгэ дахин шүүгдээ. Красноярск хотын Ольга Хорошавцева энэ шэгнүүртэ түрүүлжэ гараа.

PWL-2 гэһэн мүрысөөндэ һургуулиин хүүгэд өөрын тэмсээндэ хабаадалсаа. “Номто” гэһэн спортын клубай гэшүүн Даша Татарова дахинаа түрүүлжэ гараа. Хабарай энэ мүрысөөндэ Даша баһа 1-дэхи һуури эзэлээ һэн.

“Зугаалай” гэһэн спортын клубай гэшүүд шалгараа. Роман Гусев шангай 2-дохи һуури эзэлээ. Руслан Шарапов хүрэл медаляар шагнагдаа.

 

Хибэстээ бусаа

2021 ондо дэлхэйн чемпионадта хүрэл медальда хүртэһэн Евгений Жербаев тэрэ гэһээр хибэс дээрэ гараагүй байгаа. Жэлэй хугасаада тэрэ гэмтээһэн хүлөө аргалуулаа.

Үшөө сентябрь һарын һүүл багаар Евгений Жербаев Кызыл хотодо үнгэргэгдэһэн сэрэгшэдэй дунда мүрысөөндэ оролсоо. Мүн октябриин 14-15-ай үдэрнүүдтэ тэрэ Якутск хотодо болоһон бүхэроссиин мүрысөөндэ хабаадалсаа.

74 килограммай шэгнүүртэ Евгений хоёр уулзалга шүүжэ, финалда гаража шадаа. Красноярск хотын Исраиль Касумовтай барилдажа, 11:1 гэһэн тоотойгоор илажа, алтан медаль абаа. Энэл барилдаашантай Улаан-Үдэдэ болоһон Ородой чемпионадта 2021 ондо Евгений уулзаа һэн гээд һануулая. Тиихэдэ Красноярскын тамиршан диилэжэ гараа бэлэй.

Ургажа ябаа залуу барилдаашан Аюр Нимаев 92 килограммай  шэгнүүртэ дүрбэн илалта туйлажа, чемпион боложо тодороо. Шангай 2-дохи һуури Игорь Упхоев 70 килограммай шэгнүүртэ эзэлээ. Эдэ хоёр хүбүүдэй амжалтые олон мэргэжэлтэд “хүлеэгдээгүй” гэжэ нэрлээ.

Жаргал Дамдинов, Виктор Жербаев, Тумэн Бодиев болон Аюр Жигжитов гэгшэд 3-дахи һууринуудта гараа.

 

Мүнгэн басагад

Эрхүү можын Тулун хотоһоо уг гарбалтай Олимпиин абарга Наталья Воробьевагай шангуудта хүртэхын түлөө мүрысөөн Санкт-Петербург хотодо эмхидхэгдээ. Буряадай басагад тус хэмжээ ябуулгада амжалтатайгаар хабаадаба.

Мунсэл Цыденова, Аяна Ухеева болон Адиса Аюшеева гэгшэд өөр өөрын шэгнүүртэ шангай 2-дохи һууринуудые эзэлээ. Тэдэ булта Беларусь Уласай түлөөлэгшэдтэ шүүгдээ.

 

Зүүн хотонуудаар

Хоёр долоон хоногой эсэстэ Благовещенск ба Хабаровск хотонуудта бүхэроссиин мүрысөөнүүд үнгэргэгдэбэ. Эндэ залуу тамиршад Буряад ороноо түлөөлөө.

Амарай можын ниислэлдэ Буряадай барилдаашад 13 медальда хүртөө. Зоригто Доржиев, Владимир Ринчинов, Ринчин Ринчинов, Дмитрий Куприянов гэгшэд түрүүлжэ гараа.

Хабаровск хотодо “Ерофей Хабаров” гэжэ нэрэтэй мүрысөөн заншалта болонхой. Хоёр алтан медаль Дмитрий Куприянов, Цырен Дугаржапов гэгшэд абажа, олон тоото аха дүүнэрээ баярлуулаа.