Үрэ дүнтэй түсэл

2016 онһоо хойшо Буряадта “Самбо - һургуулинуудта” бэелүүлэгдэнэ. Мэдээжэ һоригшо Тумэн Жалсанович Санжиев түрүүшын үдэрһөө түсэл бэелүүлгэдэ хабаадана.

- Нэн түрүүн һургуулинуудаар ойлгууламжын ажал ябуулаабди. Хяагтын, Кабанскын аймагуудай болон Улаан-Үдэ хотын хэдэн һургуулинууд абаһаар лэ түсэлдэ хабаадахамнай гээ. Энэ ушараар һуралсалай гуламтануудай захиралнуудта нэн түрүүн баярые хүргэхэ һанаан байна. Түсэлдэ оролсоһон һургуулинуудта хибэс тараагдажа эхилхэдэнь, самбо барилдаае физкультурын гурбадахи хэшээлнүүдтэ заажа эхилээ. Мүнөө үедэ 16 аймагай 37 һургуули түсэлдэ хабаадана, - гэжэ Тумэн Санжиев мэдүүлнэ.

Буряадай Арадай Хуралай Түрүүлэгшэ Владимир Павловай тэмдэглэһээр, Самбо барилдаанай федераци, илангаяа хүтэлбэрилэгшэ Бадмадоржо Жигжитов ехэ ажал ябуулна.

- Самбо барилдаагаар бэеэ һоридог үхибүүдэй тоо эрид дээшэлээ. Жэшээлбэл, Хяагтын аймагта һорилго хэхэ талмайнууд багадажа эхилээ. Энээниие усадхаха хэрэгтэй. Буряадай самбо барилдаанай амжалтатай заншалые эдэмнай үргэлжэлүүлхэл байха, - гэжэ Владимир Павлов тэмдэглээ.

Тус мүрысөөнэй нээлгын баяр ёһололой үедэ Арадай Хуралай һунгамалнууд, спортын болон залуушуулай хэрэгүүдэй талаар сайд Иван Козырев гэгшэд баярай тэмдэгүүдые болон шангуудые барюулаа. Һаяхана Нижегородско можодо 16 наһа хүрөөдүй тамиршадай дунда анха түрүүшынхиеэ дайшалхы самбо барилдаагаар Ородой чемпионат үнгэргэгдэһэн байна. Тэндэ шалгарһан эдир барилдаашад мүн лэ шагнагдаа. “Самбо в школу” гэһэн түсэлдэ хабаадажа байһан үетэн нүхэдтөө тэдэ жэшээ боложо үгэнэ гээд һанагдана.

Яруунын аймагай Нарһатын 1-дэхи һургуули түсэлдэ 2019 онһоо хабаадана. Түрүүшын үдэрһөө самбо барилдаагаар Чимит (Родион) Дамбаев бэеэ һорино.

- Классаймнай хүтэлбэрилэгшэ Амгалан Гармаевич Цыденов самбо барилдаанда ябахыемнай дурадхаа. Нэгэ үдэр тэрээниие хараад, ехэ һонирхооб. Футбол ба хоккей наададаг байһанаа орхёоб. Мүнөө жэл классаймнай олон үхибүүд самбо барилдаанда ябахагүйбди гэжэ мэдүүлээ. Юуб гэхэдэ, һуралсалай жэлэй һүүлдэ ОГЭ шалгалта тушаахабди. Харин би самбогоо орхёогүйб, һорилгоёо үргэлжэлүүлнэб. Олон мүрысөөнүүдтэ хабаадажа, шангай һууринуудые эзэлһэндээ баяртайбди, - гэжэ 9-дэхи классай һурагша Чимит (Родион) Дамбаев хөөрэнэ.

Нарһатын үхибүүд энэ мүрысөөндэ шангай 3-дахи һуурида гаража шадаа. Хяагта хотын 2-дохи һургуули 2-дохи һуурида гараа. Гусиноозёрск хотын 4-дэхи һургуулиин шабинар түрүүлжэ, Арадай Хуралай гол Кубогта хүртөө.