Мүнөөдэрэйнгээ “Абаргын соло” гэжэ ниитэ гаршаг доро Дашатай танилсуулха түсэбтэйбди.
Заабол диилэхэ гээ һаа...
- Олон хүн универсальна тулалдаан ямар зүйл бэ гэжэ ойлгодоггүй. Энэмнай хэдэн шатаһаа бүридэһэн хүндэшэг тэмсээн болоно. Түрүүшын шатада бидэ армейскэ змейкэ соо- гуур гүйнэбди. Удаань хана дээгүүр абиржа гараад, гимнастическа бревно дээгүүр гүйгөөд, рукоход дээрэ гараараа аһалдаад, тоннель соогуур һолжорнобди. Тиигэжэ пистоле- дээр буудаад, хутага шэдэхэ газарта хүрэнэбди. Пистоледээр тудаагүй һаа, хутагаяа модондо хадхуулаагүй болбол, гэдэргээ бусажа, тоннель соогуураа дахинаа һолжорон гаранабди. Һүүлдэнь сеткэ дээгүүр үһээ хүрэтэр дээшээ гараад, канадаар доошоо буунабди. Дары түргөөр ринг хүрэхэдэшни, шамда нэгэ минута үгтэнэ. Энэ хугасаа соо амияа дараад, тулалдаанда бэлдэнэш, хэрэгтэй зүйлнүүдые үмдэнэш. Хоёрдохи шатада дүримгүйгөөр тулалдаан 4 раунд үргэлжэлнэ. Заабол диилэхэ гээ һаа, түрүүшын шатые нүгөө хүнһөө түргөөр гүйжэ гараха хэрэгтэй, - гэжэ Даша Жамбалов абаһаар лэ дүримүүдтэйгээ танил- суулжа эхилнэ.
Үбгэн абын үхибүүн
Ерээдүйн абарга бага наһаяа Яруунын аймагай Нарһата һууринда үнгэргөө. Бадмацырен Бальжинимаевич, Вера Лхасарановна хүгшэн эжы абындаа үндыжэ, Нарһатын 1-дэхи һургуулиин эхин классуудта һураа.
- Үбгэн абамни спортдо ехэ дуратай байгаа. Нарһатада үнгэрдэг мүрысөөнүүдые алдагшагүй һэн. Өөрөө шэрээгэй теннис, волейбол, дартс наадануудаар түрүү тамиршадай нэгэн юм. Нэгэ дахин намайгаа дахуулаад, барилдаанда абаашаа. Ехэ дурлажа хараа һэм. Тиигэжэ Мунко Дабаевич Базаров һоригшодо барилдахыемни оруулаа, - гэжэ Даша түрүүшынгээ алхамууд тухайгаа хөөрэнэ.
Улаан-Үдэдэ ажаһуудаг залуу Жаргал ба Серафима аба эжынь Даша хүбүүгээ бага хугасаада Баргажанай аймагай Улан нютагта һургаа. Тэндэшье барилдаагаа орхёогүй. Геннадий Владимирович Бубеев Баир Бадмаевич Эрхитуев хоёрой ударидалга доро Даша саг зуурын бэлэдхэл гараһан байна.
Одоошье Буряадай ниислэлдэ ерээд, 4-дэхи дунда һургуулида һу- раһан. Эндэшье дуратай барилдаагаа хаяагүй. БГУ-гай “Спартак” гэһэн спортын байшанай дэргэдэ барилдаанай секцидэ Виктория Юрьевна Кожевниковада һорилго хээ.
- Эжымни багаһаа хойшо тамирта ехэ дуратай, шуран, хурдан басаган байгаа. Хүнгэн атлетикээр яһала һайн дүнгүүдые харуулһан намтартай. Мультфильм гү, али һонирхолтой кино хараха гэхэдэшни, телевизорэй урда эжы һуубал, харуулхагүй. Дэлхэй дээрэхи мэдээжэ, суутай тамиршадые унажа, бодожо байгаад, түрүү һууринуудта гараһыень эжытэеэ хараһамни туһа болоо гү даа гэжэ һанагшаб, - гэжэ Даша мэдүүлнэ.
Оролдобол, орьёлдо гарахаш
Виктория Кожевникова хоёр жэлэй хугасаада Дашатай хүдэлөө. Бэлигтэй һоригшын хэлэһээр, Даша һорилгодо ехэ харюусалгатайгаар хандадаг байгаа, ямаршье юумэ харуулхадашни, ходо оролдосотойгоор хэдэг гэжэ тэмдэглэнэ.
Һүүлдэнь Паралимпиин наадануудай абарга болоһон Григорий Кожевниковтэй хүдэлһэн байна. Бурвод дээрэ гү, али Стеклозаводто һорилгоёо үнгэргэхэдэнь, Даша алдангүй ябажа, бэлэдхэлээ үргэлжэлүүлжэл байгаа.
- Барилдаанай талаар нэгэшье амжалта туйлажа үзөөгүйб даа. Хэды тиигэбэшье үшөө ехээр һорилго хэхэ гэһэн зорилго урдаа табяад ябагша һэм. Мүн мүрысөөндэ ошобол, ото диилдэхэш, оройдоол нэгэ балл дуталдадаг байһыень һанаад ябанаб. Минии дүү хүбүүн Чингис заа зуу һорилго хээд, мүрысөөнүүдтэ илалта туйлаад ерэгшэ һэн. Буряад Уласай чемпион болоо, Буддын заншалта Сангхын мүрысөөнүүдтэ түрүүлһэн юм. “Чингис аза талаантай хүн, ши зүрхэтэй газар хахалагшаш, удангүй амжалта туйлахаш гэжэ нэгэтэ бэшэ минии һоригшод намда хэлэдэг һэн”, - гэжэ Даша Жамбалов хөөрөөгөө үргэлжэлүүлнэ.
Түрүүшын шагналһаа эхитэй
Буряадай багшанарай колледждо һуралсалаа үргэлжэлүүлхэеэ ороо. Нэгэ һорилгын үедэ физкультурын багша Леонид Михайлович Сиратов тэрээниие обёорһон байна.
- Манай “Олимп” спортын клубай дэргэдэхи тулалдаануудай секцидэ ерэ, олон юумэндэ шамайе һургахабди. Минии дутуу дундануу- дые хэлэжэ үгэхэһөө гадна, бүхы һайн талануудыемни магтан хэлээ. Үгэдэнь үнэншэжэ, армейскэ гар тулалдаагаар, универсальна тулалдаагаар бэеэ һорижо эхилээб, - гэжэ Даша үргэлжэлүүлнэ.
Олоной хараагүй юумэ хараһан багшань эрдэни шулуу мүлиһэн мэтэ Дашые һорижо эхилээ. Удангүй Даша Жамбалов түрүүшынгээ медаль абажа шадаа. Тэрэнь хүрэл байгаа һэн.
- Шан барюулгын үедэ тон ехээр сэдьхэлээ хүлгөөб, мүрысөөнэй талмай дээрэ һанаа амар байгшаб. Тайзан дээрэ ошоходомни, һоригшо хажуудамни ябаа, ямар бэ даа һайхан хүгжэм зэдэлжэ, элдэб үнгэтэ гал нюдыемни һаргаажа байгаа. Энэ эгээл һайхан ушарые минии түрэлхид, эгэшэмни хараа һэн, - гээд, Даша һонирхуулна.
Һаял универсальна тулалдаантай танилсаһан хүбүүн хойно хойноһоо шалгаржа эхилээ. Залуушуулай дунда Ородой чемпион болоһон байна. Удангүй өөрын наһанай бүлэгтэ дэлхэйн абаргын нэрэ зэргэдэ хүртөө. 2018 ондо ехэшүүлэй дунда Ородой суглуулагдамал командын бүридэлдэ оруулагдаад, дэлхэйн чемпионадта эльгээгдээ.
- Тэрэ жэл үшөөшье залуушуулай дунда тэмсэхэ эрхэтэй байгааб. Теэд хуби заяанай ашаар ехэшүүлэй дунда тулалдаха аргаяа алдахагүй гэжэ һанааб. Диилдэшоо һаамни, намайе хэншье муухайгаар харахагүй, хараахагүй байгаа. Мүрысөөндэ ерэһэн олон нэрэ солотой тамиршад намайе танихагүй, минии тулалдаа хаража үзөөгүй, мэдэдэггүй байшоо. Бишье баһа хэнииешье танихагүй хүн ерээд, хоёр уулзалгада абаһаар лэ илааб. «Хахад финалда дэлхэйн абаргатай уулзахашни, ехэ шанга хүн», - гэжэ байгаад, намда һоригшод хэлээ. Эгээл тэрэ үедэ хүл гарни һалганажа, һанаагаа зобожо эхилээб. “Үхэрөө алданагүй хаб”, - гээд, зүбөөр бэеэ зэһээд гараһандамни гү даа, бэлэн байгаа. Харан гэхэдэмни, тэрэ дэлхэйн чемпион юушье хэжэ шадахагүй байшоо. Тиигээд өөрөө добтолгодо орожо, финалда гарааб. Тэндэ Кыргызстанай барилдааша тамиршантай уулзашооб. Эндэшье диилэжэ, түрүүшынхиеэ чемпион болооб, - гэжэ Даша урматайгаар хөөрэнэ.
Мүнөө жэлдэ Даша Жамбалов хоёрдохиёо дэлхэйн абарга болобо. Тус мүрысөөнэй үедэ тэрэ гурбан уулзалга үнгэргөө. Финалда Узбе- кистанай түлөөлэгшые шүүжэ гараа.
- Эдэ жэлнүүдтэ яһала дүй дүршэлтэй болооб. Тиимэһээ һанаа амар байгааб. Хэды тиигэбэшье тархидамни элдэб юумэн орожо, иимэ һанаа бодолнуудые намнажа, бэлэдхэлээ хээб. Жэшээлбэл, шүүгшэд буруу сэгнэлтэ табихань гү, бэеэ гэмтээнэ гүб гэхэ мэтэ бодолнууд түрөө. Эдэнээ дараад, талмай дээрэ гарахадамни, хуу мартагдаа, - гэжэ тамиршан мэдүүлнэ.
Олон зүйлөөр бэеэ һориһоор
Универсальна тулалдаанай хажуугаар дэлхэйн абарга бусад тулалдаануудаар бэеэ һорино. Универсальна тулалдаандаа тэрэ уласхоорондын классай спортын мастер юм. Мүн дайшалхы самбогоор, панкратионоор спортын мастерай нэрэ зэргэтэй. Комплексно тулалдаанда спортын мастерта кандидат болоод ябана. Эдэ олон спортын зүйлөөр бэеэ һорихоһоо гадна, Даша Жамбалов “Олимп” гэһэн түрэл болоһон спортынгоо клубта һоригшоор хүдэлнэ. Хажуугаарнь Доржи Банзаровай нэрэмжэтэ Буряадай гү- рэнэй ехэ һургуулида һуралсалаа үргэлжэлүүлнэ.
- Долоон хоногто зургаа дахин һорилго хэнэбди. Намтай хэдэн бэрхэ багшанар хүдэлнэ. Эдэ хэд бэ гэхэдэ, Леонид Михайлович, Сергей Николаевич, Мишель, Бальжир Владимирович гэгшэд болоно. Мүн минии гэр бүлэ бүхыгөөрөө намайгаа дэмжэжэ байдаг. Наһанаймни нүхэр Света, Ясмина басагамни хүсэ шадал үгэдэг юм. Бусадшье түрэлхиднай минии амжалтануудые туйлахадамни туһална, - гэжэ дэлхэйн абарга тэмдэглэнэ һэн.