“Рапид Гран-при России” гэһэн нэрэтэй мүрысөөн 10 гаран шатаһаа бүридөө. Эгээл олон шатада шалгарһан тамиршад финалда хабаадаха эрхэдэ хүртэһэн байна. Финальна шатада оройдоол 14 хүн Ородой Кубогай түлөө тэмсээ. Тэдэнэй тоодо Буряадһаа аяар гурбан түлөөлэгшэ наадаа гэжэ Буряадай Шатарай федерациин дарга, Арадай Хуралай хорооной түрүүлэгшэ Инна Ивахинова баяртай байһанаа мэдүүлнэ. Эдэ хэд бэ гэбэл, уласхоорондын гроссмейстернүүд Антон Шомоев, Жамсаран Цыдыпов, уласхоорондын мастер Эрдэм Хубукшанов гэгшэд болоно.
Буряадай тамиршан Жамсаран Цыдыпов түрүүшын турһаа абаад, түрүүшүүлэй дунда ороо. 13 уулзалгада тэрэ 8,5 очко аба- һан байна. Сургут хотын Алексей Придорожный баһа 8,5 очкотойгоор мүрысөөгөө түгэсхөө. Эндэ тамиршадай коэффициент тоологдоо. Тэрэнь Буряадай тамиршанда үлүү байжа, шангай 2-дохи һуурида гараа. Москва хотын Павел Понкратов 9,5 очко абаад, түрүү һуури эзэлээ.
Эрдэм Хубукшанов мүрысөөнэй үедэ 6,5 очко абаа. Мүн Ан- тон Шомоев оройдоол 4 очкотойгоор 13-дахи һуури эзэлээ.
Эдэ үдэрнүүдтэ Ханты-Мансийск хотодо шатарай найр үргэлжэлһөөр. Классическа шатараар Ородой Кубогта хүртэхын түлөө финальна шата эмхидхэгдэнэ. Эндэ Жамсаран Цыдыпов Эрдэм Хубукшанов хоёр түрүүшынгээ уулзалгануудта тэнсээ.