Энэ жэлэй эрхимүүд

Заншалта ёһоороо Улаан-Үдэ хотын эрхим тамиршад хэдэн шэглэлээр элирүүлэгдээ. Уласхоорондын хэмжээнэй тэмсээнүүдтэ ехэнхинь хабаадаашьегүй һаа, тон амжалтатайгаар бусад мүрысөөнүүдтэ оролсоо гээд хэлэлтэй.

Олимпиин наадануудай спортын зүйлнүүдээр эрхим тамиршанай нэрэ зэргэдэ һур харбаашан Эрдэм Цыдыпов хүртөө. 2022 оной февраль һарада тэрэ Ородой суглуулагдамал командын бүридэлдэ оруулагдажа, Европын чемпионадта хабаадажа үрдеэ. Тэндэ БГСХА-гай оюутан Эрдэм Цыдыпов шалгараа һэн. Мүн бусад бүхэроссиин тэмсээнүүдтэ тэрэ һайн дүнгүүдые харуулжа, табан эрхим һур харбаашадай тоодо оролсоһон байна. Виктория Будаева, Инна  Степанова болон Сергей Шенхоров гэгшэд тамирай энэ зүйлөөр мүн лэ эрхимүүд гэжэ нэрлэгдээ. Эхэнэрнүүдэй дунда Ородой чемпионадта шалгарһан “Номто” гэһэн спортын клубай гэшүүн Людмила  Воронцовагай түрүүшүүлэй тоодо ороһониинь гайхалгүй.

Эрэмдэг бэетэй һур харбаашад Татьяна Андриевская, Баир Шигаев, Александр Гомбожапов гэгшэд дэлхэйн чемпионадта ялас гэмэ амжалтануудые туйлаһан байна. Татьяна тэрэ мүрысөөндэ хубиин тоосоондо алтан медаль абаа һэн. Энэнь сэнтэй гэжэ хэлэмээр. Тиимэһээ Татьяна Андриевская эрхим тамиршан гэжэ нэрлэгдээ.

- 2016 онһоо хойшо жэл бүри эрхимүүдэй тоодо ороһондоо баяртайб. Теэд  түрүү һуурида анха түрүүшынхиеэ гарааб. Мүнөө жэл дэлхэйн чемпионадта ошожо, бэеэ туршажа, Ород гүрэнэй, Буряадай тамиршад хүсэ шадалтай байна гэжэ харуулаабди, - гэжэ Татьяна Андриевская мэдүүлнэ.

Олимпиин наадануудай бүридэлдэ ородоггүй спортын зүйлнүүдээр эрхим тамиршад һүүлшын үдэрнүүдтэ элирүүлэгдээ. Юуб гэхэдэ, тхэквондогоор (ИТФ) дэлхэйн Кубогта хүртэхын түлөө мүрысөөн декабрь һарада эмхидхэгдээ. Тэндэ хоёр алтан, нэгэ мүнгэн медальнуудые абаһан Александр Бодров эрхимлээ. Үшөө нэгэ тхэквондист Ангелина Пищалкина, шатаршан Жамсаран Цыдыпов, универсальна тулалдаагаар дэлхэйн чемпионадта шангай һууринуудые эзэлһэн Виталий Ананин болон Виктор Бадмаев гэгшэд түрүүшүүлэй тоодо ороо.

Доржи Банзаровай нэрэмжэтэ БГУ-гай волейболоор эрэшүүлэй суглуулагдамал команда, 2007 оной хүбүүдэй баскетболой команда спортын наадануудта шалгараа.

Үндэр наһатай тамиршадай дунда 59-дэхи гимназиин физкультурын багша Должин-Жаб Цыдыпылова эрхим гэжэ нэрлэгдээ. Тэрэ санаар урилдаанай, хүнгэн атлетикээр мүрысөөнүүдтэ һайн дүнгүүдые 2022 ондо харуулһан байна.

Энэ заншалта болоһон хэмжээ ябуулга 24-дэхи жэлээ үнгэргэгдөө гээд хэлэлтэй.