Түрүү тамиршад сугларха

Илалта туйлаһан теннисистнүүд Дамба-Даржа За­яаевай нэрэмжэтэ Буддын шажанай дээдэ һургуулиин шангуудта хүртэхэ гээд абаһаар лэ хэлэлтэй. Энэ ушараар Буддын шажанай заншалта Сангхын Дид-хамба лама Дагба Очиров­тай хөөрэлдэһэн байнабди. Юуб гэхэдэ, Дагба лама олон жэлэй хугасаада Буряадай Шэрээгэй теннисэй феде­рациин хүтэлбэрилэгшын орлогшоор хүдэлһэн юм. Улаан-Үдэ албанайнгаа хэрэ­гээр ерэхэдэнь, Ород Уласай Спортын яаманай сайд Олег Матыцинтай теннис 2022 ондо наадаа бэлэй.

- Шэрээгэй теннисээр үшөө нэгэ томо мүрысөөн Буряадта эмхидхэгдэдэг болоһондонь, спортдо ду­ратайшуул баяртай байна ёһотой. Энэ хэмжээн тухай хөөрэжэ үгыт даа.

- Буддын шажанай дээ­дэ һургуулиин шангуудта хүртэхын түлөө мүрысөөн 2-дохиёо үнгэргэгдэхэнь. 2022 оной май һарада болоһон түрүүшымнай тэмсээндэ 300 гаран хүн хабаадаһан юм. Монголой наадагшад олоор ерээ һэн.

Ород гүрэнэй Шэрээ­гэй теннисэй федерациин түлөөлэгшэд түрүүшын хэм­жээ ябуулга ерэжэ хараһан байна. Буряад Уласта хэдэн томо мүрысөөн үндэр хэмжээндэ үнгэрнэ гээд, тэдэ үндэр сэг­нэлтэ табяа. 2023 онһоо бүхэроссиин хэмжээнүүдэй мүрысөөнүүдэй тоо­до оруулагдаа. Ородой теннисистнүүдэй рейтинг эндэмнай тоологдожо эхил­хэ. Тиимэһээ Алас Дурна зүгэй, Сибириин можо хи­заарнуудай олон тамиршад ерэхээр хараалагдана. Мүн Архангельск, Самара, Москва болон бусад баруун зүгэй хотонуудай хүнүүд хон­ходожо, ерэхэеэ байһанаа мэдүүлнэ.

13 наһа хүрөөдүй үхибүүдһээ эхилээд, сагаан һаншагтай болоһон үндэр наһатай тамиршад эндэ наадаха. Бүхы нааданууд Ивол­гинск һууринда “Олимп” гэһэн спортын комплексдо гурбан үдэрэй хугасаада үргэлжэлхэ. Февралиин 10-12-ой үдэрнүүдтэ мүрысөөн болохо гээд һануулнаб.

- 2022 ондо “Байкал опен” гэһэн мүрысөөнэй үедэ “шууд-теннис” гэһэн һонирхолтой буряад наадан харуулагдаа һэн. Мүнөө мүрысөөндэ иимэ тэмсээнүүд үнгэрхэ гү?

- “Шууд-теннисые” ма­най Буряадай наадагшад зохёоһон байна. Тиимэһээ бидэ заал һаа мүрысөө үнгэргэхэбди. Бүхы дура­тайшуул эндэ хабаадаха ар­гатай. Түрүү һуури эзэлһэн тамиршан 50 мянган түхэриг шанда хүртэхэ.

- Спортдо дуратайшуу­лые, теннис наадагшадые шанга гэгшын тэмсээнүүдые харахыетнай уринабди!