Тобшо һонин

Челябинск. "Мемориал М.А.Лозоватского - 2023" гэһэн шатарай фестиваль гурбан бүлэгтэ эмхидхэгдээ. Эгээл шанга, түрүү наадагшадай дунда гурбан буряад шатаршад хабаадаа.

Уласхоорондын гроссмейстер Жамсаран Цыдыпов 6,5 очко абаад, 14-дэхи һуурида гараа. Дандар Шобоев 6 очкотойгоор 37-дохи һуури эзэлээ. 5,5 очкотой Яна Жапова 46-дахи дүн харуулһан байна. Эндэ Иранай шатаршан Барбия Данешвар түрүүлээ.

 

Шэрээгэй теннис

Южно-Сахалинск. Алас Дурна зүгэй федеральна тойрогой чемпионадта 120 гаран наадагшад суглараа. Олон эдир тамиршадһаа бүридэһэн Буряадай суглуулагдамал команда ехэшүүлэй дунда һайн наада харуулжа, 8 медальтай гэртээ бусаба.

Хубиин тоосоондо Улаан-Үдэ хотын Анастасия Голубева чемпионой нэрэ зэргэдэ хүртөө. Эрэшүүлэй болон эхэнэрнүүдэй суглуулагдамал команданууд түрүүлжэ гараа. Чемпионуудай нэрэнүүдые тэмдэглэе: Евгений Елизаров, Баир Данзанов, Батор Дамдинов, Дугар Цыбикжапов, Алдар Норбоев, Дарису Гармаева, Анастасия Голубева, Анастасия Буянова болон Виктория Сулаева гэгшэд болоно.

 

Санаар урилдаан

Раубичи (Беларусь Улас). “Номто” гэһэн спортын клубай гэшүүн Виктория Невьянцева “Первенство наций” гэһэн уласхоорондын мүрысөөндэ хабаадажа, мүнгэн медальда хүртөө.

Эстафетнэ урилдаанда Ородой 2-дохи суглуулагдамал команда шангай 2-дохи һуури эзэлээ. Эстафетын һүүлшын шатада Буряадай тамиршан урилдаа.

 

Барилдаан

Якутск. 21 наһа хүрөөдүй тамиршадай дунда Алас Дурна зүгэй чемпионат түгэсэбэ. Бүхы түрүү һууринуудые Саха (Яхад) болон Буряад Уласуудай барилдаашад абажа шадаа.

Тамир Ешинимаев, Арсалан Бальжинимаев, Аюр Нимаев, Илья Жибалов болон Чингис Балжимаев гэгшэд чемпионой нэрэ зэргэдэ хүртэһэн байна.

Апрелиин 13-17-ой үдэрнүүдтэ Ородой чемпионадта хабаадаха эрхэдэ тэдэ хүртөө. Тус хэмжээ ябуулга Якутск хотодо үнгэргэгдэхөөр хараалагдана.  

 

Тхэквондо (ИТФ).

Улаан-Үдэ. Үнгэрһэн амаралтын үдэрнүүдтэ Буряадай ниислэлдэ Алас Дурна зүгэй чемпионат эмхидхэгдэбэ. 8 можо хизаарай 500 гаран тамиршад хэдэн наһанай бүлэгтэ түрүү һуури эзэлхын түлөө тэмсээ.

Буряад Уласай тамирай болон залуушуулай хэрэгүүдэй сайд Иван Козырев амаршалха зуураа Буряадаймнай тхэквондистнууд холо ойгуур суурханхай, эндэһээ дэлхэйн болон Европын чемпионууд ургажа гаранхай гэжэ тэмдэглээ.

Ахамад шүүгшэ Мурат Сунетовэй хэлэһээр, Буряадта бүхы мүрысөөнүүд үндэр хэмжээндэ үнгэргэгдэнэ. Тиимэһээ хирэ-хирэ болоод лэ, бүхэроссиин хэмжээнэй мүрысөөнүүд эндэ эмхидхэгдэдэг  заншалтай.

Алас Дурна зүгэй чемпионадта шалгарһан тамиршад Самара хотодо үнгэргэгдэхэ Ородой чемпионадта хабаадаха эрхэдэ хүртэхэ юм.

Май һарада Улаан-Үдэдэ тхэквондогой һайндэр болохоор хараалагданхай.

“Кубок Байкала” гэһэн бүхэроссиин мүрысөөн хабаадагшадые, харагшадые хүлеэн байна.

Урилга.

Февралиин 9. Дзюдогоор 23 наһа хүрөөдүй тамиршадай дунда Алас Дурна зүгэй чемпионат. “Патриот” гэһэн спортын танхим.

Февралиин 7-12. Эхэнэрнүүдэй дунда боксоор Алас Дурна зүгэй чемпионат. ФСК.

Февралиин 10-12. Универсальна тулалдаагаар Алас Дурна зүгэй чемпионат. “Патриот” гэһэн спортын танхим.

Февралиин 9-12. Шэрээгэй теннисээр Дамба-Даржа Заяевай Буддын шажанай дээдэ һургуулиин шангуудта хүртэхын түлөө бүхэроссиин мүрысөөн. Иволгинск һуурин.

Февралиин 13-17. Гиир үргэлгөөр болон гар тулалдаагаар Зүүн зүгэй сэрэгэй тойрогой чемпионат. “Патриот” гэһэн спортын танхим.