Дурасхаалай спартакиада

Хүсэлыень хүсэлдүүлэн...

Хоёр жэлэй саана хорбоо дэлхэйһээ халин ябаһан Зоригто Цыбикмитовые нютагаархидынь мартанагүй. Мухар-Шэбэрэй соёлой ордондо дурасхаалай самбаршье хадаа һэн. Өөрынь байгуулһан “Бэлигэй һолонго” гэжэ эдир дуушадай урилдааниинь таһалгаряагүй үнгэрнэ. Харин энэ удаа һанаашалжа ябаһан спартакиаданьшье зарлагдаба.        

Зоригто Лубсанович залуушуулда ехэ мээхэй юм һэн. Алибаа шалтаг олоод лэ, нютагайнгаа найдал - хүбүүд басагадые суглуулаад, харилсажа байдаг һэн. Тиихэдээ нэгэтэшье би хээб гээд, үбсүүгээ тоншожо, утаар дуугаржа байхагүй, харин шагнаад лэ һуудаг зантай бэлэй.

Нютагайнгаа залуушуулые  нэгэдүүлхын тулада спартакиада эмхидхэхэ һанаатай байһан юм ха. Мухар-Шэбэрэй 1-дэхи һургуулиин захирал Дондок Цыбанов тэрэ хүсэлыень мэдэхэ байжа, Алдар хүбүүндэнь дурадхал оруулаа. Тиигэжэ спартакиада эмхидхэхэ талаар ажал ябуулагдажа эхилээ. Хэды удаа эмхидхэлэй хороон сугларжа, хаана, хэзээ, яагаад үнгэргэхэ тухай зүбшэн хэлсээ. Мухар-Шэбэрэй захиргаан Александр Молчанов түрүүтэй горитой ехэ ажал ябуулаа. Тиимэһээ спартакиада ехэ үндэр хэмжээндэ үнгэрөө. Олон тоото ноёд һайдые, тамиршадые хооллуулха, хүндэлхэ тала Зоригто Цыбикмитовэй гэртэхин даажа абаа.

Дэмжэгшэд олон

“Патриот” түбтэ һайндэрэй оршон үглөөнһөө мэдэрэгдээ. Али нэгэнээ угталган, үнинэй уулзаагүй нютагаархидай золголгон... Зоригто Лубсанович хүдэлжэ байһан газартаа хүндэтэй байгаа гэжэ ойлгохоор байба. Арадай Хуралай һунгамалнууд ехэ олоороо ерээ, шагналай жасада аяар 120 мянган түхэриг оруулаа.   

Удангүй хүгжэм зэдэлжэ, уладай урда үлгөөтэй энеэбхилһэн гэрэл зурагайнь дэргэдэ ноёд һайд жэрылдэн зогсобо. Алдар хүбүүниинь Бальжит Цыдыповна эжытэеэ баһал уригдаба.

Буряадай Арадай Хуралай Түрүүлэгшын орлогшо Татьяна Мантатова, Буряад Уласай Засагай газарай Түрүүлэгшын орлогшо Баир Цыренов, Улаан-Үдын мэр Игорь Шутенков, Мухар-Шэбэрэй засаг дарга Владимир Молчанов болон бусад үгэ хэлээ.    

• Зоригто Лубсанович дүршэл ехэтэй һунгамал, дээдын гарай мэргэжэлтэн байгаа. Эхэ оронойнгоо, түрэһэн нютагайнгаа түлөө зүрхэ сэдьхэлээрээ оролдожо ябаа. Хүниие хүндэлдэг, нүхэсэжэ шададаг һэн. Тиимэһээ мүнөөдэр энэ түбтэ тоогүй олон зон сугларанхай. Залуушуулые, тамиршадые ходо дэмжэдэг һэн. Буряадай Самбогой федерациие хүтэлбэрилжэ ябаа. Хэжэ ябаһан ажалынь үргэлжэлэлтэй гэжэ баярланабди, - гээд, Татьяна Мантатова онсолоод, Баир Цыреновтэй хамта Хошуун-Үзүүр нютагай залуу сэрэгшэ Андрей Батомункуевта Суворовой болон Шэн зоригой орденуудые зүүлгээ. Энэ хүбүүн сэрэгэй тусхай операцида оролсоод, нютагаа ерээд байна.

Хүхюутэй оршондо

Энэ спартакиада саашадаа Мухар-Шэбэрэй дэбисхэр дээрэ эмхидхэгдэжэ байхаар хараалагдана. Теэдшье Улаан-Үдэдэ ажаһуудаг нютагаархидта тамирай иимэ хэмжээ ябуулга хэрэгтэйл байна гэжэ үнгэрһэн спартакиада гэршэлээ. Хабаадахаяашье, харахаяашье ерэһэн Мухар-Шэбэрһээ гарбалтай залуушуул (45 наһа хүсөөгүйшүүл) олоор суглараа.

Аймагай 10 нютаг һууриие түлөөлһэн хабаадагшад ана-мана урилдаа. Социальна сүлжээндэ нютагай бүлгэм соо видео-буулгабаринууд үргэлжэ эльгээгдэжэ байгаа. Армспорт, волейбол, һээр шаалган, дартс гэһэн шэглэлээр залуушуул урилдаа. Түрүүлһэн команданууд мүнгэн бэлэгһээ гадуур хонин төөлэйдэ хүртөө.

 Спартакиадын гол шүүгшэ Баир Дашибальжировай дуулгаһаар, шанга тулалдаанууд болоо, илангаяа канат таталгаар болон волейболоор мүрысөөнүүдые харагшад хоолойнгоо һөөлдэтэр хашхаралдан, нютагайнгаа командын түлөө һүрэлдэн байгаа. Спартакиадын дүнгүүдээр, түрүүшын һуурида Сагаан-Нуурай залуушуул хүртөө. Хоёрдохи һуури – Калиновкын сомоной, гурбадахи һуури Хүсөөтын сомоной команданууд абаа. Илалтын түлөө бүхыгөөрөө ороһон Хонхолын командада тусхай шан «САРТО» (хүтэлбэрилэгшэнь Даша Гомбожапов) бүлгэм барюулаа.     

Сагаан-Нуурай залуушуул 50 мянган түхэриг шангаа сэрэгэй тусхай операцида оролсожо байһан нютагаархидтаа дамжуулба. Хошуун-Үзүүрэй командынхид олоһон бүхы шангаа залуу сэрэгшэ Андрей Батомункуевта барюулаа.

Эбээн тэдхэһэн бүхы эмхинүүдтэ эмхидхэлэй хороон баяраа мэдүүлнэ.