Алас Дурна зүгтэ

Бокс

Алас Дурна зүгэй иимэ мүрысөөн анха түрүүшынхиеэ Буряадта болобо гээшэ. Табан үдэрэй туршада 13-14, 15-16 болон 17-18 наһатай басагад, 19-40 наһатай эхэнэрнүүд ринг дээрэ гараа. Хажуугаарнь 19-22 наһатай залуу хүбүүд эрхимүүдээ элирүүлээ.

Буряад Уласай Боксын федерациин хүтэлбэрилэгшэ Валерий Доржиевай тэмдэглэһээр, Улаан-Үдэдэ энээнһээ бүри томо мүрысөөнүүд болоһон байна. Тиимэһээ 11 можо хизаарай 200 гаран тамиршадые угтан абахада, бэлэн байгаа.

Бүхы дээрээ талмайн эзэд 40 медаль абажа шадаа. Тэдэнэй 15-иинь алтан зүһэтэй байһаниинь баярламаар. Эдир болон залуу тамиршадай хажуугаар ринг дээрэ дүй дүршэл ехэтэй түрүү боксёрнууд Дарима Сандакова болон Кристина Ткачёва гэгшэд гараа. Любовь Шарапова, Анастасия Павлова болон Дарья Пантелеева гэгшэд мүн лэ түрүү һуурида гаража, Буряад Уласаа бүри үндэр хэмжээндэ түлөөлжэ, амжалта туйлахаар бэлэн байһанаа харуулаа.

 

Универсальна тулалдаан

Энэ спортын зүйлөөр мүрысөөн Буряадта анха түрүүшынхиеэ эмхидхэгдээ. Ушар гэхэдэ, универсальна тулалдаануудта гол шухала һуури эзэлдэг хэрэгсэлнүүд үгы байгаа.

- Манай спортын зүйлдэ “полоса препятствия” эгээл хэрэгтэй хэрэгсэл болоно. Бидэ энээниие һаяхана 800 мянган түхэригөөр худалдажа абаабди. Мүрысөөнэй түрүүшын шатада тэрэниие  хүн бүхэн дабажа гарана. Эндэ тамиршан шуран байхаһаа гадна, мэргэн байха ёһотой. Тэдэ пистоледээр буудана, хутага шэдэнэ. Түрүүшын энэ шата эрхимээр дабажа гараад, ринг дээрэ гаража тулалдана, - гэжэ Буряадта универсальна тулалдаанай эхи табигша Леонид Сиратов хөөрэнэ.

Универсальна тулалдаагаар бэеэ һорижо байһан, сэрэгэй тусхай үйлэ  хэрэгтэ баатарай үхэлөөр унаһан Агван-Жамса Банзановай мүнхэ дурасхаалда мүрысөөн зорюулагдаа. Росгвардиин сэрэгшэдэй талаһаа гарай бэлэг, баглаа сэсэг Павел Сыренович, Ольга Леонидовна  аба эжыдэнь барюулагдаа.

- Агван-Жамса манай багшанарай колледжын эрхим оюутадай нэгэн байһан юм. Түрүүшын үдэрһөө бэеэ һайн талаһаа харуулаа. Универсальна тулалдаагаар бэеэ һорижо эхилээ. Хажуугаарнь номоо эрхимээр үзэжэ, хэмжээ ябуулгануудта хабаадажа үрдидэг һэн, - гэжэ Буряадай багшанарай колледжын захирал Светлана Нимбуева мэдүүлнэ.

Алас Дурна зүгэй түрүүшын мүрысөөндэ Магаданай, Владивостогой, Благовещенскын, Хабаровскын, Шэтын, Улаан-Үдэ хотын тамиршад хабаадаа. Эрхүүгэй тамиршад дэмжэхэеэ ерэһэн байна. Түрүү һуури эзэлэгшэд Ородой чемпионадта хабаадаха эрхэдэ хүртөө.

Буряадай тамиршад Ород гүрэн дотор түрүүшүүлэй тоодо ородог. 2022 ондо эдиршүүлнай командна тоосоондо гол шанда хүртөө һэн. Ехэшүүлэй дунда Ородой чемпионадта манай тамиршад ганса Москва, Санкт-Петербург хотын командануудые урдаа оруулһан юм, - гэжэ омогорхон Леонид Сиратов мэдүүлнэ.

 

Дзюдо

23 наһа хүрөөдүй тамиршад Улаан-Үдэдэ суглараа. Нэгэ үдэрэй туршада болоһон мүрысөөндэ татамиин эзэд 13 медаль абажа шадаа.

Буряадай эрэшүүл, эхэнэрнүүд тус тустаа гурба-гурбан алтан медальнуудта хүртөө. Игорь Гайсин, Рашид Омаров, Степан Степанов, Валерия Солдатова, Анастасия Лебедева, Виктория Непомнящих гэгшэд түрүүлжэ гараа.

Буряадай татами дээрэ шалгарһан барилдаашад Екатеринбург хотодо үнгэргэгдэхэ Ородой чемпионадта хабаадаха эрхэдэ хүртөө.

 

Даам наадалга

Сибирь болон Алас Дурна зүгэй даам наадагшад хамтаржа, нэгэдэмэл чемпионат мүнөө жэлһээ үнгэргэжэ эхилбэ. Түрүүшын иимэ уулзалга Эрхүү можын Ангарск хотодо болоһон байна.

Ород гүрэн дотор эгээл шанга даамшад Саха (Яхад) Уласта ажаһуудаг юм. Тэндэһээ олон тоото дэлхэйн чемпионууд ургажа гараа. Энэшье удаа яхад тамиршад мүрысөөнэй бүхы медальнуудые абажархин алдаа. Эрхүү можын, Буряад Уласай, Красноярска хизаарай хэдэн наадагшад түрүүшүүлэй тоодо оролсожо шадаһаниинь һайшаалтай.

9 наһа хүрөөдүй эдиршүүлэй дунда Виктория Бадмацыренова блиц- нааданда хүрэл медаль абаа. Энэл наһанай бүлэгтэ түргэн даам наадалгада Дарья Белькова шангай 2-дохи һуури эзэлээ.

Эрэшүүлэй дунда БГУ-гай багша Александр Урбаханов классическа даам наадалгада түрүүлжэ гараад, олониие гайхуулаа.

 

Ушу

Буряадай ушуистнар Ород гүрэн дотороо эрхимүүдэй тоодо дэмы ородоггүй байһанаа гэршэлээ. Благовещенск хотодо үнгэргэгдэһэн Алас Дурна зүгэй мүрысөөндэ тэдэ 121 медаль абажа шадаа.

Буряадай 14 тамиршад алтан медальнуудта хүртэһэн байна. Никита Васильев, Анна Леонова, Ренат Гаученов, Инга Пурбуева болон Ксения Булычева гэгшэд өөр өөрын наһанай бүлэгүүдтэ абсолютна чемпионууд боложо тодороо.

 

Барилдаан

Урда долоон хоногто Буряадай 21 наһа хүрөөдүй барилдаашад Алас Дурна зүгэй мүрысөөндэ амжалтануудые туйлаһан байна. Үнгэрһэн долоон хоногой эсэстэ 18 наһа хүрөөдүй барилдааша хүбүүд басагад шалгараа.

Благовещенск хотодо Буряадай түлөөлэгшэд 21 медальда хүртөө. 30 медаль абаһан Саха (Яхад) Уласай тамиршад командна тоосоондо түрүүлээ.

Басагадай дунда Буряадай тамиршад зургаа дахин түрүүлээ.
Лилия Моторина, Должон Цынгуева, Аяна Цыренжапова, Арина Хохлова, Светлана Низовцева болон Алина Хандажапова гэгшэд 1-дэхи һууринуудые эзэлээ. Эрдэни Цыденжапов, Тумэн Дондоков болон Эрдэм Цыремпилов гэгшэд алтан медальнуудые абаа.

Февралиин 16-17-ой үдэрнүүдтэ Буряад Уласта ехэшүүлэй дунда Алас Дурна зүгэй чемпионат үнгэргэгдэхэнь. Эндэ 250 гаран барилдаашад хабаадаха. Бүхы финальна уулзалганууд февралиин 17-до үнгэргэгдэхэ юм.