​Тамирай тобшо һонинууд

Тобшо һонин

Шэрээгэй теннис

Казань (Татарстан Улас). Буряадай “Барис” команда Ородой чемпионадай 3-дахи шатада хабаадаба. Суперлигэдэ наададаг суглуулагдамал командамнай энэ удаа гурбан илалта туйлаа, дүрбэн уулзалгада бирагүйдөө.

3-дахи шатын удаа “Барис” команда 34 очко абажа, 5-дахи һуури эзэлнэ. Саранск хотын “13 регион” команда 39 очкотой түрүүлнэ. Бүхы дээрээ 15 команда эндэ наадана гээд һануулая.

 

Сосновый Бор (Ленинградай можо). Ородой командна чемпионадай дээдэ лигын “А” бүлгэмдэ Буряадай “Алтана” команда түрүүлжэ ябана. 25 нааданай удаа тэдэ 50 очко абанхай. Тэдэ бүхы уулзалгануудаа шүүгээ.

 

Баскетбол

Москва. 2007 оной Буряадай суглуулагдамал команда Ородой чемпионадай финальна шатада эдэ үдэрнүүдтэ хабаадаба. Бүлэгэй наадануудта тэдэ Татарстанай болон Московско можын наадагшадые илажа, бүлэг соогоо 2-дохи һуури эзэлээ. 1/8 шатын нааданда Новгородско можын командые шүүжэ, эрхим 8 командын тоодо орожо шадаа.

 

Бага футбол

Улаан-Үдэ. Бүхэроссиин “Мини-футбол в школу!” гэһэн түсэлэй Алас Дурна зүгэй финальна шата 3-дахияа Буряадай ниислэлдэ эмхидхэгдэнэ. Мартын 2-5-ай үдэрнүүдтэ 2009-2010 ба 2011-2012 онуудай үхибүүдэй дунда шанга тэмсээнүүд болоо.

Эндэ хабаадаһан Буряадай 4 команда шангай һууринуудые эзэлжэ шадаа. Хяагтын аймагай Кудара-Сомон һууринай басагад наһанай хоёр бүлэгтэ шангай 2-дохи һуури эзэлжэ, мүнгэн медаляар шагнагдаа. Хүбүүдэй дунда Гусиноозёрск хотын 5-дахи, Улаан-Үдэ хотын 56-дахи һургуулинуудай команданууд хүрэл медальнуудые абаа.

Эдэ үдэрнүүдтэ аха классуудай команданууд эрхимүүдые элирүүлнэ. Мүрысөөн мартын 9-дэ түгэсэхэ.

 

Санаар урилдаан

Кемерово. “Дети Азии” гэһэн үбэлэй хүүгэдэй наадануудта Буряадай  санашан Лидия Федотова хоёр алтан медальда хүртөө.

Уласхоорондын хэмжээндэ үнгэргэгдэһэн тэмсээн 12 гүрэнэй түлөөлэгшэдые суглуулаа. 800 гаран тамиршад  спортын 10 шатаар мүрысэһэн байна.

Лидия Федотова эстафетнэ урилдаануудта хоёр алтан медаляар шагнагдажа, Алас Дурнын федеральна тойрогой суглуулагдамал командада түрүү һуури эзэлхыень туһалаа. “Нүхэсэлэй эстафетэдэ” Москвагай, Кемеровын ба Татарстанай басагадаар “Берёзка” команда байгуулжа, 1-дэхи һуури эзэлээ.