​Түрүүшүүлэй тоодо оробо

Дайшалхы самбо барилдаагаар Красноярскын хизаарай нээмэл түхэлэй мүрысөөндэ Буряадай тамиршад хабаадажа, дүрбэн медальтай гэртээ бусаһан байна.

Сагдаагай албанай полковник ябаһан, самбо барилдаагаар бүхэроссиин хэмжээнэй шүүгшэ Василий Волошенкын нэрэ мүнхэлхэ гэһэн зорилготойгоор энэ мүрысөөн үнгэргэгдөө. Анха түрүүшынхиеэ эмхидхэгдэһэн тулалдаануудта Красноярскын хизаарай тамиршадһаа гадна, БуряадУласай, Новосибирскын можын түлөөлэгшэд айлшаар буугаа. Тус мүрысөөндэ2001-2002 оной тамиршад хабаадаһан байна гээшэ.

Жамьян Тудупов 52 килограмм хүрэтэр шэгнүүртэ гурба дахин илалта туйлаад, чемпион болоһон байна. 80 килограммһаадээшэ шэгнүүртэ Элбэк Шалуев баһа гурбан уулзалга үнгэргэхэ аад, финалда хабаадаха тамиршаниинь хибэс дээрэ гараагүй. Тиимэһээ тэрэ алтан медальда хүртөө.

Буянта Дашибалов 56 килограммай шэгнүүртэ хоёрдохи һуури эзэлээ. АрсаланТыхеев 75 килограммда гурбадахи һуурида гараа. Хамгаалалгын “Дозор” гэһэн агентствын бэе тамирай талаар бэлэдхэлгын гол мэргэжэлтэн Юрий Александрович Доржитаровай хүтэлбэри доро шан абаһан эдэ хүбүүд һорилго хэнэ. Мүнөө үедэ тэдэ Ородой чемпионадта хабаадахаяа шанга бэлэдхэл гарана гээд хэлэлтэй.

Алёна Шагдуровагай гэрэл зураг