666
«Үбһэ хоол апрель һарын гаратар малда үгтэжэ байгаа. Тиимэһээ хони малнай үбэлэй ута нюргые һайн дабажа гараа һэн», - гээд, ажахын түрүүлэгшэ Жаргал Цыренов дуулгана.
«Нёдондонойхидо орходоо, үбһэ ногоон шэнгэншэг. Тиигэбэшье яһала бараг лэ даа. Зунай эхеэр - июнь һарада зай забһаргүй бороон ороо һаань, ногоон улам һайн байха һэн», - гээд, тэрэ тэмдэглэнэ.
Үбһэ нөөсэлгын халуун хаһада «Белорус» трактор, орооһоной косилка, үбһөө тарааха техникэ хэрэглэгдэдэг. Юрэнхыдөө, шухала энэ ажалда хабаадуулагдаха хамаг трактор, техникэ бэлэн.
Тус ажахынхид Бобхой гэһэн газарта буряад «бүүбэй» үүлтэрэй хонидые үсхэбэрилдэг юм. Ажахынхид Шэтэдэ болоһон хони ямаадай үзэмжэдэ амжалтатай хабаадажа, медальнуудта хүртэжэ ерээ.
Бүрхэг, бороотой үдэрнүүдтэ ажахынхид хонидойнгоо хото хорёо заһабарилна. Мал ажал гээшэ бултанда мэдээжэ гүб даа. Амарха саг гэжэ байдаггүй. Малые мэхэлхэгүйш. Үдэр бүриин оролдолгоор, хоёр хүлэйнгөө хойшоо харатар ябаһанай ашаар лэ амжалта туйлагдадаг.
Фото: Жаргал Цыреновэй дурадхаһан гэрэл зураг
