​Буряадта үер бү болоһой даа

Мүнөө жэлдэ хура бороон элбэг байжа, Буряадтамнай үер боложо магадгүй. Сэлэнгэ мүрэн болон Үдэ голнай үдэрһөө үдэртэ ехэ боложо байна.

“Һэргэг байха шухала!” гэһэн мэдээ Улаан-Үдэ хотын захиргаанай мэдээсэлэй албан дуулгана. Уһанай гаража боломоор газарнуудые элирүүлхэ тухай даабари хотын гурбан аймагай хүтэлбэрилэгшэдтэ үгтэбэ. Үшөө тиихэдэ харюусалгатай зон ээлжээлэн хүдэлхэ болоно.

Улаан-Үдын аюулгүй байдал сахидаг албанай мэргэжэлтэд үдэр бүри Үдэ голой, мүн Сэлэнгэ мүрэнэй уһанай байдал хэмжэнэ. Хажуугаарнь ажаһуугшадые болгоомжотой байхыень уряална. Мэргэжэлтэдэй мэдээсэһээр, июниин 15- ай байдалаар Сэлэнгэ мүрэнэй уһанай хэмжүүр 186 см болоод байна. Харин энэ хэмжүүр 230 см болобол, уһан эрьеһээ гараха. 330 - 400 см болотор уһан бодобол, ажаһуугшадта аймшагтай болохонь.

Эгээл ехэ үер 1991 ондо Улаан-Үдэдэ болоһон юм. Тиихэдэ Сэлэнгын уһан 496 см болотор нэмээ. Иимэрхүү үерэй болохо болоо һаань, Улаан-Үдэдэ, мүн тэрэнэй захын аймагуудай 48 мянган ажаһуугшад уһанда абтаха болоно.