«Шадаха зэргээрээ шармайнабди»

- Эржена Тогтохоевна, та сомон даргаар хэр үнинэй хүдэлнэ гээшэбта?

- 2022 оной мартын 23-ай һунгалтын дүнгүүдээр ню­тагайнгаа сомон дарга болооб. Жэлһээ үлүүтэй хүдэлжэ байнаб. Шадаха соогоо. Урид сомон даргын орлог­шоор 15 жэлэй туршада хүдэлөө хүм.

- Тиимэһээ ажалаа һайн мэдэнэт.

- Шэб шэнэ ажал бэшэшье һаа, ондоол байна. Олон зон­той ехээр хүдэлхэ хэрэгтэй болоно. Би өөрөө экономист­би. Ехэнхидээ тоололгынгоо ажал хээд лэ, олониитын энэ тэрэ ажалда арга соогоо хамһаад байгша һэмби. Харин мүнөө бүхы юумэ өөр дээрээ ашаад ябаха гээшэ гайтай байна. Зониие бодхоохо хэрэгтэй ха юм. Нюа­тагаархиднай хүнгэн, ураг­шатай байһаниинь болоо гээшэ.

Гулваа болоһоор, нэн түрүүн Яруунынгаа 95 жэ­лэй ойн баярта бэлэдхэл эхилээб. Сурхарбаанда гурбадахи местэдэ орообди. Сагаалганда 2-дохи местэдэ гараабди. Шада яда хүдэлнэлди даа.

Мүнөө ехэ аюултай саг ерээд байна. Ойн түймэрэй һүжэрхэдэ, хүнүүдые бодхоожо, ой модондоо гаража, саралгын ажалда хамһалса­набди.

- Тэрээгүүртнай ой мо­дон дүрэнэ гү?

- Үльдэргын сомоной дэ­бисхэр дээрэ дүрөө. Олиггүй ехээр. Бурхан хаража, саһан орожо хаагаа. Үбдэг­сөө гэхээр 10 сантиметр зу­заан саһан ороо. Уржадэрэй саана болоно гээшэ ааб даа. Бүхы Яруунадамнай ороо. Хориһоо нааша. Түймэр яһала унтараагаа. Гэбэшье... гайтай. Яруунынгаа Захир­гаанай даабари үгэхэтэй­нь сасуу патрульно-манев­реннэ группын зонтой хада дээрээ гаража, дүрбэн зүг найман хизаар руу хаража, утаа онобол, ошожо унтарааха ёһотойбди. Тиимэл даа мүнөөдэрэй ажалнай.

- Мүнөө энэ библиотекэеэ шэнэлбэбди. Райомнай энэ хэрэгтэ 400 гаран мянган түхэриг үгөө. Евро-сонхо­нуудые табижа, зосоо газаагүй шэнэлбэбди. Мүнөө сагай эрилтээр лэ энээниие хүдэлгөөхэ һанаатайб­ди. Библиотекэмнай апрелиин 15-да нээгдэхэ. Үдэр гарганхайбди. Уран уншаг­шадай урилдаа эмхидхэхэм­най. Хүгшэн залуугүй энэ хэмжээндэмнай хаба шада­лаа туршаха аргатай.

- Үльдэргэдэ мүнөө хэды зон ажаһуунаб?

- 1100-гаад ажаһуугшад бии гэжэ данса соогоо бүридхэнхэйбди. Үнэн дээрээ 700-гаад хүн ажаһуудаг. Һургуу­лидамнай 100 үхибүүн, садиг­тамнай 40-өөд үхибүүн тоологдоно. Мүнөө сагайхяар яһала олон гээшэ ааб даа.

Клубнай хүдэлдэг – залуу мэргэжэлтэд ерэнхэй. Хатар­шадай 3 ансамбль нээнхэй. Тэдэнээ ехэл дэмжэжэл бай­набди.

Мүнөө жэлдэ КСК тайл­даа. Бүхы Буряадаар хэлэгдээ һааб даа. Дуулаһаншье бай­гаа аабзат. Хүбүүд манай ури­гдажа, барилга хэгдээ. Рай­омнай баһал хамһалсаа. Ба­рилдаанай, тренажерно зал­нууд, тенниснэ, бильярдна шэрээ юумэтэй болохобди. Зал соомнай хибэсүүд дэлгээгдэнхэй - үхибүүд барил­дажа эхилэнхэй. Эдир барил­даашаднай тамирай мастер­та кандидадууд болонхой. 9-дэхи ангиин 2 хүбүүд иимэ һайн дүнгүүдтэй.

Ажал хэрэг ябажал бай­на. Саашадаа һур харбаа­шадые һоридог болгохо һанаан байна...

- Һургуулиин багшанартнай наһатайнууд гү?

- Хахадынь пенсионер­нүүд. Теэд хэд бэ даа залуу­шуулдаа дүршэлөө дамжуулха хэрэгтэй ха юм даа. Хуу сугтаа хүдэлнэл даа. 33 зон – бүхы кол­лективынь. Тэрээнһээ 20-ёо­дынь багшанар байгаа ааб даа.

- “Үльдэргэ” ажахы “Үнэн” сонин уншагшадта мэдээжэ. Хэр ажалаа ябуул­наб ажахыгаархин?

- СПК-мнай ажалаа һайн ябуулдаг. Орооһо таряагаа таряад, адуу малаа үдхөөд лэ байна. Һайн лэ гээшэ!

- Зонтой хүдэлхэдэ хэр бэ?

- Шадахал соогоо ажал­най хэгдэжэл байна гээ­шэ. Зонтой хүдэлхэдэ, тиимэшье бэлэн бэшэ. Хүн бүхэндэ һайн болохогүйш. Хүндэшэг байна. Тиибэшье хүдэлхөөр.

- Түсэбүүдтэй?

- Музей байгуулха һанаатайбди. Үльдэргын ажахы байгуулһан Жамбал Доржие­вич Сампилондо зорюулһан музей анхандаа байһан юм. Тэрэнээ дахинаа һэргээхэ һа­наатайбди. Экспонат юумэниинь миин хэбтэжэ байна. Музей байгуулаал һаа, бидэ одоо ехээр баярлаха һэмди.