Түрүү бодолтой хүбүүд түрэл нютагаа хүгжөөхэл

Урагшаа һанаатай хүбүүн дүрбэн жэлэй саада тээ Санкт-Петербург хотоһоо Бу­ряад ороноо бусажа, уг ажа­лаа ябуулха гэжэ шиидээ. Тиигэжэ тэрэ Россиин Буддын шажанай заншалта Сангхын хамба лама Дамба Аюше­евтэ хандажа, “Ниитэ хонин һүрэг” гэһэн программада хабаадаха болоо. Тус про­граммын аша туһаар Васи­лий Балданов өөрын хонин һүрэгтэй болоо. Мүнөө хо­нидойнь тоо 300-да хүрэнэ. 100 толгойень бусаагаа гээд тэмдэглэлтэй. “Мал хараха - ама тоһодохо” гэһэн арадай сэсэн мэргэн үгэнүүдэй ёһоор, түрэл газар дээрээ хони ма­лаа үсхэбэрилжэ байдаг зон муу байдаггүй. Хамба ламын туһаламжаар өөрын ажахы­тай болоһондоо урматайб. Саашанхи түсэбүүдни олон. Нэгэниинь гэхэдэ, энэ жэл­дэ үшөө 100 толгой хони мал арьбадхаха дуратайшуулда тараахаб”,-гээд, залуу эдэб­хитэн тэмдэглэнэ.

Эдэбхи үүсхэл ехэтэй Ва­силий Балданов саг үргэлжэ шэнэ юумэндэ һуража байдаг. Тэрэ хэдэн жэлэй саада тээ Ивалгын дасанай дэргэдэ арһа элдэжэ һураа. Мүнөөнэй оршон сагта һайн шанартай, химеэр болбосо­руулhан синтетикэгүй зүйлнүүд ехэ эрилтэтэй болон­хой. Тиимэһээ элдэгдэһэн хониной арһан эрилтэтэй байха гээд һанагдана. “Энэл арһаараа авто-унаанууд соохи бүреэһэнүүдые, аянша­лагшадай, ангуушадай аян замдаа хэрэглэхэ дулаа­хан хүнжэлнүүдые, сээжэб­шэнүүдые, дүрэнхэнүүдые болон бусад зүйлнүүдые бүтээхэ һанаан байна”, - гээд, тэрэ хөөрэнэ.

Тус түсэл бодото байдал­да бэелүүлхын тула 700 мян­ган түхэриг хэрэгтэй. Энэ мүнгэнэй зарим хуби цехэй байшан барилгада гаргаша­лагдаха. Бэшэнь оёдолой ма­шинануудые, бүдүүдые, һабагшануудые абалгада хэрэ­глэгдэхэ. Оршон үеын сагта түрүү бодолтой залуушуул интернедэй арга боломжо зүбөөр хэрэглэдэг, олзотой омогтой ябадаг болонхой. 27-той Василий Балданов эдэ бүгэдые һайн ойлгожо абанхай. Залуу фермер ин­тернет соо boomstarter гэһэн платформодо энэ хэрэг ту­хайгаа мэдээсэл оруулаад, хүн зонһоо захил абана. 700 мянган түхэригэй захилай суглархадань, тэрэ ажалаа ябуулжа захалха. Нютагай арба гаран хүн ажалтай бо­лохо. Арадайнгаа заншалта урлал һэргээн хүгжөөхэ, ню­тагаархидаа ажалтай болгохо һэдэлгэтэй хүбүүндэ туһа­ламжа хэрэгтэй. Холын хараа бодолтой хэрэгыень дэмжэхэ спонсорнууд олдогдохо бэзэ гээд найдагдана. “Инвестор боложо, 100 гү даа, али 100 мянга гаран түхэригөөр туһа­лагшадта энэл мүнгыень бу­саахаб. Юуб гэхэдэ, энэ хэрэгни урагшатай, ерээдүйтэй”, - гээд, зориг ехэтэй хүбүүн он­солно.