560
Энэ яармаг-фестивальда Байгал шадарай аймагhаа гадуур Хяагтын, Захааминай, Баргажанай аймагуудай нютагуудhаа түлөөлэгшэд ерээ. Бултадаа дүй дүршэлтэй уран гартан, мүн лэ бэлигтэй уран hайханай бүлгэмүүд байһанаа гэршэлээ. Жэшээнь, Хяагтын аймагай түлөөлэгшэд хониной нооhоор бэлдэгдэhэн гоё гэгшын хубсаhа хунар олоной үзэмжэдэ дурадхаа. Мүн лэ арадай уран hайханай үзэмжэдэ заха холын Захааминай аймагай Ехэ Сахир нютагhаа Чингис Лыгденов ерэжэ, өөрынгөө бүтээлнүүдые дэлгээгээ.
«Арт-Байкал» гэhэн түбэй түсэлэй зорилго хадаа хүдөөгэй уран гартанай ажал хэрэг арад зоной дунда дэлгэрүүлжэ, тэдэнэй бэлиг шадабари олоной анхаралда үргэнөөр дурадхалга болоно.
Манай түбэй дэргэдэ залуу уран дархан hуралсал гаража, жэлэй туршада хэhэн бүтээлнүүдээ эндэ харуулна, - гэжэ «Тепло традиций» гэhэн яармаг-фестиваль эмхидхэгшэ Татьяна Черных хөөрэбэ.
Энэ басаганай габьяа соёлой сайд онсо тэмдэглэнэ hэн. «Татьяна Черных - бэрхэ басаган, аймаг, нютаг бүхэндэ иимэ эдэбхитэй басагадай байбал, ехэ һайн байха һэн. Ямараар бэе бэедээ туһатай, ямараар нютаг нугамнай һайн тээшээ хубилха байгааб даа. Залуушуул гээшэмнай өөрын харасатай, онсо бодолтой, шэнэ сагтай адли гэшхэлдэг зон гээшэ. Татьяна тон тиимэ», – гэжэ Буряад Уласай соёлой сайд Соёлма Дагаева тэмдэглээ.
Энэ хэмжээ ябуулга Буряад Уласай байгуулагдаhаар 100 жэлэй ойн баярта зорюулагдаа юм гэжэ хэлэлтэй.
