Үсэд сэтгүүлшэнэй үрдисэ ехэ

«АТВ» теле-субагай агаарай долгиндо «Дэнзэ» гэһэн дамжуулга та олоной һонорто». Иимэ үгэнүүдээр дамжуулгануудаа эхилдэг залуу сурбалжалагша Баярма Раднаевагай нэрэ олондо нилээд мэдээжэ болонхой. Ургажа ябаһан сэтгүүлшэнтэй уулзажа, ажабайдалтайнь дүтөөр танилсажа, саашанхи түсэбүүд тухайнь хөөрэлдэһэн байнабди.

 - Сайн байна, Баярма! «Дэнзэ» дамжуулга бэлдэхэһээ гадуур «Буряад ФМ» радиодо хүдэлнэш. Тиихэдэ Интернедтэ ажал ябуулна гэжэ мэдэнэбди. Эдэ бүхы ажалнуудаа ямар сагтаа бүтээжэ үрдидэг гээшэбши? Хэжэ байһан ажал тухайгаа тодоор хөөрэжэ үгыш?

- Олон ажал нэгэ дороо хэбэшье, нэгэ һалбарида хүдэлнэ гээшэ аабзаб. Бүхы сагаа тааруулаад, түсэблөөд байбал, үрдижэ ядахаар юумэн үгы. «АТВ» гэһэн теле- субагта буряад дамжуулга бэлдэнэб. Тэрэнээ нэгэ бага ондоохоноор хэхэ гэжэ оролдообди. Харагшаднай өөһэдынгөө буулгаһан һонин зураглалнуудые маанадта эльгээжэ, дамжуулгадамнай оролсохо аргатай. Тиимэһээ арад зондо һонирхолтой байна. Буряад хэлэн мартагдажа байна гээд, үдэр бүри хэлсэдэг болонхойбди. Түрэлхи хэлэеэ аршалан хамгаалаад, улам дэлгэрүүлхэ хэрэгтэ өөрынгөө багаханшье хубита оруулнаб гэжэ һанахадаа, зосоом аятай болодог. Дамжуулгамни жэлһээ үлүү сагта хоёр долоон хоногто нэгэ дахин гаража байна. Энэ ажал тухайгаа хөөрэжэ байгаа хадаа сугтаа хүдэлдэг Михаил Кисилёв гэжэ нүхэрөө магтаха дуран хүрэнэ. Энэ хүмнай ород яһанай. Жэл соо намтай дамжуулга бэлдэхэдээ, буряад үгэнүүдые яһала ойлгодог болоо. Хэдэн үгэ холбожо, буряадаар дуугаржа, намайгаа хүхеэдэг юм (энеэнэ).

Харин радиодо хүдэлхэдөө, бүхэли үдэрөө түсэблэхэ гээшэнь намда тон хүндэ байдаг. 24 сагаа минута ба секундаарнь хубаарилжа түсэблэхэ ёһотойбди. Энэ дамжуулгын удаа ямар дуун зэдэлхэб гэхэ мэтэһээ эхилээд, хуу бэшэхэ хэрэгтэй бшуу. Тиигэбэшье телевидени радио хоёр өөрын онсо илгаатайнууд гэжэ ойлгооб. Алишье һалбаридань хүнгэншье, хүндэшье таланууд бии.

Харин Интернедээр хэдэг ажал тухай хөөрэхэ болоо һаа, ерээдүйдэ бүхы ажалнай тэрээн соо хэгдэхэ гээд хэлэхэ шухала. Би мүнөө нютагайнгаа зониие эблүүлһэн «Долина Баргузина» гэһэн бүлэг Инстаграмда байгуулаад, тэндээ һонирхоһон юумэнүүдээ бэшэдэгби. Зураглалнуудаа хэдэгби. Үшөө тиихэдэ «Бурятия онлайн» гэһэн хамталигтай холбоо барижа, ажал ябуулнаб.

- Сэтгүүлшэнэй ажал яагаад шэлээ һэмши? Номыень үзэһэн?

- 2011 ондо Буряадай гүрэнэй дээдэ һургуули дүүргэхэдээ, «ород хэлэнэй ба уран зохёолой багша» гэһэн мэргэжэлтэй болоо һэм. Тэрэл жэлдээ мэргэжэлээрээ хүршэ Монгол орондо ажаллахаяа ошоо бэлэйб. Тэндэ нэгэ жэл соо ажаллаад ерэхэдээ, монголоор ходо ярижа байхадаа, түрэл буряад хэлэмнишье хурсадаа. Удаань Буряадай телевиденидэ ерэжэ хүдэлхэдөө, сэтгүүлшэнэй ажалтай дүтөөр танилсааб. Жэл тухай болоод, «Ариг Ус» теле-субагай «Мүнгэн сэргэ» дамжуулгын сэтгүүлшэнээр шэлжэн орооб. Тэндээ таһалгаряагүйгөөр 6 жэлэй туршада ажаллахадаа, яһала дүршэлтэй болооб, хүдэржөөб. 2019 ондо Үндэһэтэнэй музейдэ мэдээсэлэй албанда орожо хүдэлжэ байтараа, һөөргөө телевиденидээ бусааб. Харин бусахадаа, өөрын шэнэ түсэлтэйгөөр ерээб. «АТВ»- гэй хүтэлбэрилэгшэдтэй холбоо барижа, дурадхалаа хэлэхэдэмни, тэдэ дэмжээ. Тиигэжэ «Дэнзэ» дамжуулгамни «нара хараа». Минии һанахада, сурбалжалагша бүхэн өөрын түсэл бэелүүлхэ, дамжуулга гаргажа байха һанаа бодолтой ябадаг. Би олон жэлдэ һанажа ябаһан хүсэлэйнгөө бэелһэндэнь амаргүй баяртай байдагби. Харин Интернет сүлжээндэ зураглал бэлдэхэ гээшэнь мүн лэ баһа ондоотой байна даа. Эндэ тэндэһээ гар утаһанайнгаа аргаар сэхэ холбоо барижа, олондо дамжуулхадашни, хэдэн мянган хүн тэрэ дороо хараха, мүн һанаһанаа хэлэхэ, бэшэхэ аргатай. Тиихэдэнь урматай, хэһэн ажални миин бэшэ гэжэ ойлгохош. Тиимэ сагта шуһаншни бусалаад, зүрхэншни түшэгэнөөд абаха.

- Дамжуулгадаа яагаад һонирхолтой зураглалнуудые олонобши? Харагшадшни дурадхадаг гү? Мүнөө дамжуулгадаа юу харуулха гэжэ бэлдэжэ байнабши?

- Яагаад бэ даа олдоод лэ байдаг. Ээлжээтэ зураглалаа буулгажа байхадашни, удаадахи дамжуулгын геройнууд олдохо. Тиихэдэ үшөө харагшад дурадхаа аабза. Жэшээнь, мүнөө гарагай 5-да ээлжээтэ дамжуулгадаа Хурамхаанай аймагай Гааргын аршаан хүрэһэнөө харуулхабди. Урдандаа ехэ мэдээжэ амаралтын ба эмнэлгын газар байһан аад, мүнөө хаясаанай болонхой байна. Тиибэшье тэндэхи байра байшангуудыень нэгэ бага заһабарилбал, үшөө һайнууд. Тэндэ яһа уһанай үбшэнгүүдһээ эхилээд, олон ондоо үбшэ аргалдаг байгаа. Тэрээнээр һонирхобол, дамжуулгыемнай адаглажа хараарайт.

- Өөр тухайгаа уншагшадтамнай хөөрэжэ үгыш?

- Би Баргажанай Хилгана һайхан нютаг тоонтотойб. Дороо дахуулжа ябаха дүү хүбүүтэйб. Бэлигтэ дүүмни мүнөө Новосибирск хотодо барилгын һалбарида ажаллана. Манай эндэхи ВСГУТУ дүүргэһэн инженер мэргэжэлтэй. Аба эжымни хоюулаа багшанар юм. Абамни - Жаргал Павлович, эжымни - Светлана Бадмаевна. Баабаймнай түүхын багша юм. Олон жэлдэ Хилганынгаа һургуулиин захиралаар хүдэлнэ. Харин эжымни тоо бодолгын багшаар баһал олон жэлдэ хүдэлнэ. Би өөрөө үшөө хадамда гараадүйб. Сагаан агтые жолоодоһон илдам гансаяа хүлеэһээрби (энеэнэ).

- Бүхы эрхилһэн ажалайшни урагшатай, бүтэсэтэй байхыень хүсэнэб! Саг оложо уулзаһандашни баярые хүргэнэб.