Нютагай магтаалнууд

Буряад орон

Түрэһэн нютагаа дурдахадаа
Түүхэ һайхан Буряад ороноо
Түрүүшын дуугаар  домоглон
Түрэл хэлэн дээрээ бэшэнэб.

Хүдөө нютагта холын замда
Хөөрэлдэн танилсан ябахадаа
Хэлэхэ байнаб - Буряад оронойб
Буянтай бурхантай эхэнэрби.

Байгал далай омогорхолтой
Баян байгаали һонирхолтой
Холын оронһоо айлшадтай
Хари гүрэнөөр холбоо заяатай.

Энэ дэлхэйн гайхал болоһон
Этигэлээ Хамба хүн бүхэнөө
Элинсэг сагайнгаа үнгэрбэшье
Эмнэжэ адислаһан зандаал.

Түүхэ ехэ домхи аршаантай
Түрэл һайхан Түнхэн нютаг
Түшэг болоһон нютагай дээжээр
Түмэн зоноо адислан амаруулна

Һайхан даа, Буряад оромнай
Һанал бодол тэгшэлһэн
Баян байгаали зоной баялиг
Бардам бэлиг бурьялан байдаг.

Ага нютагни

Буряад ороной тойрог уурхай
Баян омог холбоо харгы
Буряад яһатан үдэн хүгжэһэн
Буян заяан Ага нютагни.

Ара Аргалиин дабаа дабабал
Аажам тала Ага нютагни
Ая гангаар анхиланхай
Аятайхан намая угтадаг.

Буддын шажанай бурханай орон
Буурал Алхана нютагай түшэг
Үеын үедэ буянай харгыда
Үүдэн сүмэеэ  нээнхэйл.

Таряан далай долгилжол байгаал
Табан хушуу мал бэлшэжэл байгаал
Сагай эрьесын байдалаар
Малшье үсөөрөө, таряаншье үгырөө.

Бууралхан аба эжым тоонто
Буян хэшэгээр дүүрэн тогоон
Байһан ажабайдалайм адис
Баяр бэлигэйм сүршөөл аршаан.

Алтан гадаһан нютагай хүбүүд
Арюун тоонто гэртээ бусажа
Аба эжынгээ бууса һэргээжэ
Амар дорюун байдалаа зохёоно.

 Тоонто нютагни

Жэнтээхэн бэедэм дулаахан
Жэлэжэ бодолым бодхооһон,
Жааханайм үлзытэй үлгы
Жаргалайм тоонто Таптаанайм.

Зориг шадалым үргэһэн,
Зулаа бадараажа угтаһан,
Залуугайм дулаахан уурхай
Заяанайм нютаг Таптаанайм.

Ажалай харгыда үреэһэн,
Адуу малаар хэшэглэһэн,
Аян замда үдэшэһэн
Аза жаргалайм Таптаанайм.

Аса-Шэбэр арюун нютагта
Азатай Хамбын табистай
Захагүй ехэ үреэлтэй
Замай залин Таптаанайм.

Сэнхир сагаан Саханайгаа
Сэдьхэлээ хүдэлгэн харанаб,
Сарюун наһыем дэмжээһэн,
Сагаан эдеэтэй Таптаанайм.

Мунхан гүбээ обоодоо
Мүргэжэ сэдьхэлээ заһанам
Үндэр наһыем үреэһэн,
Үргэл ехэтэй Таптаанайм.