Илагшадай тоодо

Грантын ашаар 3 сая түхэриг мүнгэ шүүһэн буряад театрайхид А.Островскиин «Лес» гэһэн зүжэг найруулха юм.

Ород Уласай театральна холбоон суута драматург А.Островскиин түрэһөөр 200 жэлэйнь ойн баярта дашарамдуулан, тус урилдаа эмхидхэһэн байна. Илажа гараһан 19 театрай тоодо хүршэ Эрхүүгэй А.Охлопковой нэрэмжэтэ драмын академическэ театр оролсобо.

Түсэбэй ёһоор  үгтэһэн мүнгэн гансал тус зүжэгтэ - мэргэжэлтэдэй харгыда, байха байрада, декораци, бутафори, грим болон тайзан дээрэ хэрэглэгдэхэ бүхы юумэнүүдые бүтээхэдэ гаргашалагдаха. Үшөө тиихэдэ илагшадай тоодо ороһон бүхы зүжэгүүд байгша оной декабриин 15 болотор бэлдэгдээд,  тайзан дээрэ табигдаха эрилтэтэй.

-Энэ хадаа манай театрай шүүһэн хоёрдохи грант болоно гээшэ. Нёдондо бидэ Алас Дурна зүгэй театрнуудай дунда иимэ урилдаанай үнгэргэгдэхэдэнь,  «Эмгээ. Бабушка» гэһэн зүжэг найруулан табиха аргада хүртэһэн байнабди. Грант бэшэхэ гээшэ бултанай оролдолгоор бүтэдэг юм, - гэжэ театрай захирал Цыпилма Очирова хэлэнэ.