174
Буряад Уласай Хүн зониие ниигэмэй талаар хамгаалгын сайд Татьяна Быковагай хэлэһээр, 2025 ондо үншэн үхибүүдые гэр байраар хангаха хэрэгтэ 500 сая түхэриг холбоото уласай ба уласай бюджедүүдһээ һомологдобо. 40 гэр байра, 112 үнэмшэлгэ һомологдоһон мүнгөөр абтаха юм. Сэрэгэй тусхай операцида хабаадаһан үншэн зондо гэр байрын үнэмшэлгэ ээлжээндэ байнгүйгөөр үгтэхэ.
- 3,5 сая түхэригэй үнэмшэлгэ олон хүүгэдтэй (6 ба 6-һаа дээшэ) бүлэнүүдтэ дэмжэлгэ болон үгтэхэ. Мүнөө Буряад Уласта 650 иимэ бүлэ тоологдоно. Зургаан үхибүүтэй бүлэнүүд жэл бүри олон болоно,- гэжэ Татьяна Быкова хэлэбэ.
2025 оной февралиин 1-нэй байдалаар Буряад Уласта 5000 гаран үншэн хүүгэд гэр байра абаха ээлжээндэ байна. Тэдэ булта 18-һаа дээшэ наһатай. 2023 ондо холбоото уласай мүнгэн һанһаа 270 сая түхэриг һомологдожо, 115 гэр байра абтаһан байна. Уласай һанһаа һомологдоһон мүнгөөр 2 байра абтаа, 368 сая түхэригэй 131 үнэмшэлгэ барюулагдаа.
2024 ондо 114 хүн бэлэн гэр байраар хангагдаа, тэрэ тоодо 72 хүн Тарбагатай ба Мухаршэбэр һууринуудта уласай хүрэнгэжүүлгын түсэлөөр баригдаһан гэрнүүдтэ байратай болоо. Гэр байра абаха 185 үнэмшэлгэ барюулагдаа, тэрэ тоодо сэрэгэй тусхай үйлэ хэрэгүүдтэ хабаадаһан 89 үншэн хүндэ. Холбоото уласай ба нютаг можын бюджедүүдһээ 671 сая түхэриг һомологдоо һэн.
Тэмдэглэхэдэ, үншэн үхибүүд уласай дэбисхэртэ гэр абаха аргатай, үгы гэбэл, тэдэндэ гэр байрын үнэмшэлгэ барюулагдана. Үнэмшэлгэтэй зон Россиин алишье буланда гэр худалдажа абаха аргатай.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
