Буряадай Ивалгын аймагай олзын хэрэг эрхилэгшэдтэ гүрэнэй дэмжэлтэ тухай хөөрэбэ

Февралиин 26-да Ивалгын аймагта Буряад Уласай олзын хэрэг эрхилэгшэдэй эрхэ хамгаалха талаар бүрин этигэмжэтэ, хиналтын органуудай,  аймагай засагай түлөөлэгшэд, аймагай олзын хэрэг эрхилэгшэдэй хабаадалгатайгаар залан хүтэлбэрилгын зүблэл ажалаа ябуулба.

- Иимэ хэмжээ ябуулганууд Буряад Уласай Толгойлогшо Алексей Цыденовэй даабаряар үнгэргэгдэнэ. Олзын хэрэг эрхилэгшэдэй аймагуудай захиргаануудтай хамта ажалаа хэлсээтэй ябуулжа, харилсаагаа үргэдхэхэ гэһэн зорилго эндэ табигдана. Буряад Уласта олзын хэрэг хүгжөөхэ хангамжын ажахы байгуулагдана. Ивалгын аймаг хотодо дүтэ оршодог, тиимэһээ эндэ олзын хэрэг хүгжөөхэ, шэнэ түсэлнүүдые бэелүүлхэ арга олон, - гэжэ Буряад Уласай олзын хэрэг эрхилэгшэдэй эрхэ хамгаалха талаар бүрин этигэмжэтэ түлөөлэгшэ Чингис Матхеев хэлэбэ.

Зүблэлдэ гүрэнэй талаһаа үзүүлэгдэдэг дэмжэлгэ тухай хөөрэбэ. Олзын хэрэг эрхилэгшэд техникэ, түхеэрэлгэнүүдые абаха элдэб янзын тэдхэмжэдэ, грантда хүртэхэ аргатай. Гадна тэдэнэр гүрэнэй дэмжэлгээр аяншалгын хабсарагдадаг объектнүүдые абаха, гаргашынгаа зарим хуби бусаажа шадаха юм. Тиихэдэ олзын хэрэгтэ туһатай урьһаламжа тухай зүблэлдэ хөөрэбэ. Үмсын хэрэг эмхидхэхын тула тусхай программын ёһоор элдэб янзын урьһаламжа абажа болохо.

- Прокуратурын органууд зарим асуудалнуудые шиидхэхэ талаар туһаламжа үзүүлхэ, хуулиин талаар ойлгууламжын ажал ябуулха аргатай. Бидэ заншалта ёһоор гүрэнэй засагай түлөөлэгшэдтэй хэлсээтэй хүдэлнэбди. Уласай аймагуудта хүн зон ажабайдалаа түхеэржэ, үхибүүдээ хүмүүжүүлжэ, ажал хэжэ байхын тула ехэ оролдолго гарганабди. Эдэ зорилгонууд эдэбхитэй олзын хэрэг эрхилэлгэтэй нягта холбоотой, - гэжэ Ивалгын аймагай прокурор Доржи Будаев хэлэбэ.

Прокуратурын ба Роспотребнадзорой түлөөлэгшэд хиналтын талаар ажаябуулга тухай хөөрэжэ үгэбэ. Олзын хэрэг эрхилэгшэдэй үүсхэлээр эдэ эмхи зургаануудай мэргэжэлтэд туһатай заабаринуудые үгэхэ аргатай.

Ивалгын аймагта олзын хэрэгэй 4000 гаран түлөөлэгшэд тоологдоно. Аймагай толгойлогшо Николай Емонаков экономикын хүгжэлтэ тухай хөөрэбэ.

- Ивалгын аймаг Буряад Уласай эгээл томо аймагуудай нэгэн болоно. Һүүлэй арбан жэлэй туршада 27000 гаран хүн манай аймаг руу зөөжэ ерээ. Үнгэрэгшэ жэлдэ 5000 хүн ерээ. Манай аймагта залуушуул олон, бидэ эдэбхитэйгээр хүгжэнэбди. Олзын хэрэг эрхилэгшэд экономико хүгжөөлгын үндэһэ һуури болоно, тэрэниие ойлгонобди, - гэжэ Николай Емонаков тэмдэглэбэ.
Тэнсүүрилгын зүблэлдэ ерэһэн олзын хэрэг эрхилэгшэд һонирхоһон асуудалнуудаар харюунуудые абаа, тэдээндэ элдэб зүбшэлнүүд, туһатай заабаринууд үгтөө. Гадна нэмэлтэ семинарнуудые эмхидхэхэ шиидхэбэри абтаа. Буряадай Толгойлогшын даабаряар хэмжээ ябуулганууд Буряад Уласай бүхы аймагуудта саг үргэлжэ үнгэргэгдэжэ байха.