Монгол гүрэнэй олзын хэрэг эрхилэгшэдэй делегаци Буряад Улас ерэхэеэ бэлдэнэ

Улаан-Баатар хотын захиргаан байгша оной зун Буряад орон руу ерэхэ олзын хэрэг эрхилэгшэдэй делегаци бүридхэжэ эхилхэнь. Иимэ шиидхэбэри Монголой ниислэлэй толгойлогшо Хишгээгийн Нямбаатар мартын 20-до үнгэргэгдэһэн Буряад Уласай Толгойлогшо Алексей Цыденовтэй уулзалгын дүнгөөр абаа.

Хишгээгийн Нямбаатар Буряад Уласай Засагай газарай түлөөлэгшэдэй танилсуулһан түсэлнүүдээр ехэтэ һонирхобо. Буряадай делегаци Улаан-Баатарай хүтэлбэрилэгшые элдэб янзын продукцитай мүн танилсуулаа. Эдэ бүгэдэ Монголой ажаһуугшадта һонирхолтой байхань дамжаггүй.

- Бидэ уулзалгада олон асуудалнуудаар хөөрэлдөөбди. Манай улас ЖКХ-гай, зайн галай һалбаринуудай, харгынуудые ба олон байратай гэрнүүдые хангалгын  талаар мэргэжэлтэдые һургаха арга боломжотой. Тиихэдэ болбосоролой ба элүүрые хамгаалгын һалбаринуудай мэргэжэлтэдые бэлдэхэ асуудал шиидхэхэбди. Мүнөөдэр ород хэлэ бэшэгэй багшанарые бэлдэхэ программа бэелүүлэгдэжэ байна. Монголой эрхэтэд манай ехэ һургуулинуудта түлбэригүйгөөр ород хэлэнэй багшын мэргэжэлтэй болоод, Монгол гүрэндөө ажаллаха аргатай. Үйлэдбэриин талаар 24 түсэлтэй танилсуулаабди. Олзын хэрэгэй харилсаа үргэдхэхэ тухай хэлсээбди, - гэжэ Буряадай Толгойлогшо Алексей Цыденов хөөрэбэ.

Буряад орон мүнөө сагай эрилтэдэ таарама түхеэрэлгэнүүдые Монгол гүрэн руу эльгээхэ аргатай. Түхеэрэлгэнүүд хүршэ гүрэнэй һонирхол мүн татаа.

Хяагта хотодо оршодог хилэ дээгүүр гараха пункт дээрэ олзын хэрэг эрхилэгшэд бэрхэшээлнүүдтэй дайралдана. Энэ асуудал уулзалга дээрэ харагдаа. Хоёр гүрэнэй хоорондо наймаа улам эршэтэй болгохын тула энэ асуудал түргэн шиидхэхэ тухай шиидхэбэри абтаба.

- Алексей Цыденовэй ударидаһан делегаци хамтын саашанхи ажаябуулга тухай үргэнөөр мэдээсэбэ. Албан хэрэгэй харилсаа хүгжөөхэ, хамтын түсэлнүүдые бэелүүлхэ зорилготойгоор бизнес-делегаци бүридхэжэ, байгша оной июль һарада Улаан-Үдэ эльгээхые дурадханаб. Улаан-Үдэ Улаан-Баатар хотонуудай хоорондохи хамтын ажаябуулга шэнэ, бүри үндэр хэмжээндэ гаргахын түлөө бүхы хүсэ шадалаа элсүүлхэбди, - гэжэ Монголой ниислэлэй хүтэлбэрилэгшэ Хишгээгийн Нямбаатар тэмдэглэбэ.