210
Мартын 21-дэ Хяагтын аймагта олзын хэрэг эрхилэгшэдэй ээлжээтэ зүблөөн үнгэргэгдэбэ. Зүблөөндэ Буряад Уласай олзын хэрэг эрхилэгшэдэй эрхэ хамгаалагша
Чингис Матхеев хабаадаа. Иимэ хэмжээ ябуулганууд урид Ивалгын, Тарбагатайн, Зэдын аймагуудта үнгэргэгдэһэн байна. Буряад Уласай Толгойлогшын даабаряаар олзын хэрэг эрхилэгшэдэй зүблөөн таһалгаряагүй эмхидхэгдэдэг болохо.
Суглаанда хабаадагшад Хяагтын аймагай олзын хэрэгэй объектнүүдые хараба.
- Олзын хэрэг эрхилэгшэд аймагуудай захиргаануудтай, хиналтын органуудтай хэлсээтэй ажалаа ябуулха ёһотой. Энэ асуудал иимэ хэмжээ ябуулгануудай гол зорилго болоно. Олзын хэрэг эрхилжэ байһан зоной һанаа зобоохо асуудалнууд тухай хамта зүбшэн хэлсэхэ, шиидхэбэринүүдые абажа байха ёһотойбди, - гэжэ Чингис Матхеев хэлэбэ.
Олзын хэрэг эрхилэгшэдэй зүблөөн дээрэ мүнгэн тэдхэмжэ ба гүрэнэй талаһаа дэмжэлгэ, татабариин ба хиналтын хуулида оруулагдаһан нэмэлтэ хубилалтанууд тухай хөөрэлдөөн болоо. Түгэсхэлдэнь Хяагтын аймагай прокурор Виликтон Баранниковтай уулзалга эмхидхэгдээ. Олзын хэрэг эрхилэгшэд прокурорто асуудалнуудые табижа, харюунуудые абаа. Бизнес-омбудсмен, хиналтын органуудай түлөөлэгшэд эндэ бодхоогдоһон асуудалнуудые хараадаа абаа. Тэрээнһээ гадуур Чингис Матхеев мүнөө жэлдэ баригдаһан шэнэ автовокзал хараба. 396 хоёролжон метрэй талмайтай 2 дабхар байшан пассажирнуудые һуулгаха ба буулгаха платформотой, сүүмхэнүүдые хадагалха камератай. Эндэ автобусуудай зогсохо газар зохёогдоо, жорлон, буфет, наймаанай, банкын таһагууд мүн бии. Автовокзалһаа аймаг доторой 29 маршрут эмхидхэгдэнэ, тиихэдэ Улаан-Үдэ руу автобусууд зониие шэрэдэг.
«Кяхта» гэһэн тамуужанай ба логистикын терминал сугларагшад мүн хүрэбэ. Шэнэ терминалай дэбисхэр дээрэ нэгжүүл хэдэг зурууд, эд бараа буулгаха ба ашаха талмайнууд, зошод буудал, эд бараа хадагалдаг склад, ресторан, хоёр лаборатори бии.
- Мүнөө шэнэ лабораторинуудай нээгдэһэн ушараар ашаа шэрэлгэ улам эршэдэнэ. Сүүдхын туршада 300-500 авто-унаа дансалнабди. Энэ объект Буряадай Толгойлогшын таһалгаряагүй адаглалга доро байдаг. Мартын 20-до Буряадай Толгойлогшо Алексей Самбуевич Цыденов Монголһоо бусаха зуураа манда хүрөө. Терминал руу ошодог харгы үргэдхэхэ, видео-адаглалга тодхохо тухай даабари тэрэ үгөө. Эдэ бүгэдэ тамуужанай ажалда һайн талаһаа нүлөөлхэ, - гэжэ «Кяхта» терминалай генеральна захирал Николай Кушнир тэмдэглээ.
Автор: Янжима ДАРМАЕВА бэлдэбэ
Фото: Буряад Уласай Засагай газарай мэдээсэлэй албан
