​Владимир Путин эмшэдтэ урмашуулгын ба нэмэлтэ түлбэри саашадаань түлэхөөр үргэлжэлүүлээ

Ородой Холбоото Уласай Юрэнхылэгшэ шууд эфиртэ гарахадаа, Буряад Уласай анестезиолог-реаниматологтой хөөрэлдэһэн байна

Ородой Холбоото Уласай Юрэнхылэгшэ эмшэдэй мэргэжэлтэ һайндэрэй угтуулан видео-холбоогоор эмнэлгын һалбариин хүдэлмэрилэгшэдтэй уулзажа,   онсо аюултай байдалай үедэ хүдэлһэнэй түлөө урмашуулгын ба тусхай түлбэри саашань түлэхэ тухай мэдүүлээ.

- Бүхы ниитэ зоной оролдолгоор, эрхэтэдэй харюусалгаар ба танай баатарлиг ажалай ашаар үбшэн тахал бууража байна. Зүгөөр тэрээниие усадхаха талаар үргэлжэлһөөр, энээн тухай таанар намһаа һайн мэдэжэ байнат. Тиимэһээ эмнэлгын һалбариин ажалшадай ажал ехэ зандаа. Үшөө хоёр һараар, имагта июль ба август һарануудта коронавирустай үбшэнтэнтэй хүдэлжэ байһан эмнэлгын ажалшадта федеральна бүхы түлбэринүүдые болон нютаг можын нэмэлтэ мүнгэ саашань түлэхэ хэрэгтэй гэжэ һананаб, - гэжэ Владимир Путин хэлээ.

Ородой Холбоото Уласай Юрэнхылэгшын хэлэһэнэй ёһоор, салинда нэмэлтэ бүхы түлбэринүүд жэлэй амаралтада гарахада, заабол тоологдохо ёһотой. Урид абтаһан шиидхэбэриин ёһоор, тус нэмэлтэ мүнгэн хубиин нюурнуудай налогһоо сүлөөлэгдэһэн юм.

Тиихэдэ гүрэнэй толгойлогшо Ородой Холбоото Уласай Засагай газарта коронавирусай шэнэ халдабариин үбшэнтэндэ туһа хүргэлсэһэн, ажаллаһан оюутад, ординаторнууд, аспирантнуудые урмашуулха дурадхалнуудые оруулхыень даалгаа.

Онлайн-уулзалгын хабаадагшадай нэгэн “Буряад Уласай усал аюулай эмнэлгын нютаг дэбисхэрэй түбэй” тусхай бригадын анестезиолог-реаниматолог Алексей Антошин болоо юм.

- Коронавирусай шэнэ халдабариин таража эхилһэн үедэ танай даабаряар манай можо нютагта сэгнэшэгүй ехэ туһа хүргэгдөө. Бидэ “С” классай 11 реанимобильнуудые абаабди. Манай албанай ажал түргэн туһаламжын юм. Минутын хоорондо асуудал шиидхэгдэдэг. Заримдаа секундашье хэрэгтэй болодог. Сагтай урилдан байжа хүдэлхэдэ, эдэ автомашинануудай ашаар абарагдаһан хүнүүдэй ами наһан олон болохо гэжэ би һананаб. Тиихэдэ эмнэлгэнүүдые тоногжуулгада, хэбтэхэ унтариин жаса зохёон байгуулгада ба эмшэдэй бэе хамгаалха хэрэгсэлнүүдые худалдан абалгада шэглүүлэгдэһэн 400 сая түхэриг мүнгэ һомолһоной түлөө танда баяр хүргэхэ дуран хүрэнэ, - гэжэ врач хэлээд, Эмнэлгын ажалшадай баярай үдэрые угтуулан, суг хүдэлдэг нүхэдөө хани халуунаар амаршалаа.