​Алас Дурнын тэдхэмжэ – Буряад Уласай хүдөө нютагуудта

Буряад Уласай Толгойлогшо Алексей Цыденовэй июниин 21-дэ Кабанск аймагаар албанай хэрэгээр ябахада, Ильинка һууринда Алас Дурнын тэдхэмжын хэмжээндэ худалдан абтаха соёлой эмхиин шэнэ байшан уласай хүтэлбэрилэгшэдэ харуулаа.

1969 ондо баригдаһан хүдөөгэй хуушан клуб 2017 ондо хаагдаһанай удаа 4300 ажаһуугшадтай һууринда соёлой талаар хэмжээ ябуулганууд үнгэргэгдэхэеэ шахуу  болоһон байгаа. Эмхи зургаанда 184 хабаадагшадтай 13 бүлэгүүд хүдэлдэг.

Тиихэдэ ажаһуугшадай эдэбхитэй ябадаг номой сангай байшанда ехэ заһабарилга хэхын тула мүнгэн хэрэгтэй. Интернедтэ орохо аргатай, мүнөө үеын компьютернуудаар хангагдаһан техникэтэй номой санда ажаһуугшадай 60% ябадаг юм. Жэлһээ жэлдэ номой сангай байра хуушаржа, һандарха туйлдаа хүрэжэ байна.

Харин хүүгэдэй уралигай һургуулиин таһаг юрэнхы болбосоролой һургуулида ажалаа ябуулжа, бүхы хүүгэд нэгэ класста хэшээлээ үнгэргэнэ.

Тиимэһээ соёлой байшан, модельнэ ба хүүгэдэй номой сан, хүүгэдэй уралигай һургуулиһаа бүридэһэн соёлой-мэдээсэлэй түб байгуулхын тула, шэнэ томо байшан хэрэгтэй.  Иимэ түбэй барилгада 100 сая түхэригһөө дээшэ мүнгэн гаргашалагдаха.

2020 оной апрелиин 1-һээ соёлой байшан, хоёр номой сан, хүүгэдэй уралигай һургуули оруулха байшан хүтэлбэрилэгшэд хүлһэлнэ. Тэрэнь хүнэй хубиин мэдэлдэ юм. 828 дүрбэлжэн метрэй талмайтай байшанда ехэ заһабари хэгдэнхэй, соёлой эмхи зургаануудай ажалада тааруулагданхай. Объектын сэн 48,5 сая түхэриг болоно.  Алас Дурнын тэдхэмжын хэмжээндэ мүнгэн һомологдожо, байшан худалдажа абтаха болоо юм.

Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро үнгэрһэн Алас Дурнын ниигэмэй-эдэй засагай хүгжэлтын асуудалаар комиссиин суглаанай дүнгүүдээр Буряад Уласай дэбисхэртэ шэнэ 16 хэмжээ ябуулгануудые үнгэргэхэ гэжэ зүбшөөгдөө:

- Хяагта хотодо хүүгэдэй сэсэрлигэй барилга,

- Нестерово һууринда Соёлой байшанай барилга,

- Улаан-Үдэдэ тулалдаанай можо нютагай түбэй барилга,

- Улаан-Үдэдэ 35-дахи һургуули ба Наушка тосхондо һургуулида ехэ заһабарилга,

- Хойто-Гол ба Шэмхэ һууринуудта соёлой байшануудай ехэ заһабарилга,

- Баргажан тосхондо хүүгэдтэ туһа хүргэхэ “Звездный” түб ба Северобайкальскын ниигэмэй-реабилитационно түбэй ехэ заһабарилга.

Тиихэдэ Улаан-Үдэдэ Хүн зониие ажалаар хангалгын түбэй ба хотын 1-дэхи  поликлиникын амбулаториин, Ильинка һууринда соёлой байшанай, Шэнэ Бэрээн һууринда котельниин, Петропавловка һууринда модульно котельниин байшан худалдан абтаха. Буряад Улас 24 автобусуудые худалдан абажа: 2 автобус - Муя аймагта, 22 автобус Улаан-Үдэдэ дамжуулагдаха.