​Буряад Уласта Юрэнхылэгшын зарлигаар 16 наһа хүрэтэр үхибүүн бүхэндэ үшөө 10 мянган түхэриг түлэгдэхэ

Июниин 23-да Владимир Путин Ород гүрэнэй эрхэтэдтэ хандахадаа, 3 наһанһаа 16 хүрэтэр хүүгэдтэй гэр бүлэнүүдые дэмжэһэн хэмжээнүүдые үргэлжэлүүлэн, 16 хүрэтэр наһанай үхибүүн бүхэндэ 10 мянган түхэригэй нэгэ түлэгдэхэ түлбэри түлэхэ июль һарада үргэлжэлүүлэгдэхэ гэжэ мэдүүлээ.

- Энэ мүнгэн хүндэ сагта Ород гүрэнэй гэр бүлэнүүдтэ горитойхон нэмэри боложо үгөө. Гэхэтэй хамта, эдэй засаг хүсэд хүсэндөө үшөө ороогүй байна, харин ажалгүйшүүл үшөө олошороо. Хүндэ байдал үшөө үнгэрөөгүй байна. Тиимэ ушарһаа үшөө нэгэ дахин, июль соо, түрэһөөр 16 наһа хүрэтэр үхибүүн бүхэндэ нэмэлтэ 10 мянган түхэриг түлэхэ хэрэгтэй гэжэ һананаб. Юрэнхы дээрээ 28 сая хүүгэдые үндылгэжэ байһан гэр бүлэнүүд энэ тэдхэмжэдэ хүртэхэ аргатай, - гэжэ Юрэнхылэгшэ хэлээ.

Ородой Холбоото Уласай Пенсионно жаса июль соо 16 наһа хүрэтэр хүүгэдтэй түрэлхидтэ, хүүгэдые үргэжэ абагшадта, харгалзагшадта болон тэдхэгшэдтэ шэнэ түлбэринүүд түлэжэ эхилхэ.

Шэнэ түлбэриин онсо шэнжэ юун болоноб гэхэдэ, тэрэниие абахын тула иишэ тиишээ хандаха хэрэггүй. Пенсионно жаса хүнэй мэдүүлгэгүйгөөр 5 мянган ба 10 мянган түхэригэй түлбэри үзүүлхэ тухай шиидхэбэриин үндэһөөр бэшэг баримтануудые бүридхэжэ, данса руу мүнгэ шэлжүүлхэ юм.

- Гурба хүрэтэр хүүгэдтэ һара бүриин түлбэри гү, али 3-һаа 16 хүрэтэр хүүгэдтэ нэгэ түлэгдэхэ түлбэри абаһан түрэлхидтэ, хүүгэдые үргэжэ абагшадта болон харгалзалагшадта 10 мянган түхэригэй июль һарын нэмэлтэ түлбэри түрүүн оруулһан мэдүүлгээр түлэгдэхэ, мэдүүлгэ шэнээр оруулха хэрэггүй , - гэжэ Ородой Холбоото Уласай Пенсионно жаса дуулгана.

Тус түлбэри абаха тухай үшөө хандаагүй түрэлхид болон харгалзалагшад 3 хүрэтэр хүүгэдтэ түлбэри тухай, үгы гэбэл 3-һаа 16 хүрэтэр хүүгэдтэ түлбэри тухай мэдүүлгэнүүдые оруулһанай удаа нэмэлтэ 10 мянган түхэриг абаха. Гурба һарын турашад – сентябриин 30 болотор мэдүүлгэнүүдые оруулха хэрэгтэй. Хэрбээ тэрэниие зүбшөөрһэн ба шэлжүүлһэн байгаа һаа, 10 мянган түхэригэй нэмэлтэ түлбэри мүнгэн мэдүүлгэгүйгөөр гэр бүлэдэ түлэгдэхэ.

Буряад Уласта июниин 17-ной мэдээгээр апрель һараһаа июнь болотор һара бүри 5 мянган түхэригөөр 3 хүрэтэр наһатай 39,5 мянган хүүгэд абаа (юрэнхы дээрэ 544 сая түхэриг). 3-һаа 16 наһа хүрэтэр 174 мянган хүүгэдтэ 10 мянган түхэригөөр 1,7 млрд түхэриг түлэгдөөд байна.