355
Буряад Уласай Толгойлогшо Алексей Цыденов июниин 25-да хотын һургуулинуудта эдеэ хоол бэлдэдэг комбинадай ба Д. Аюшеевэй нэрэмжэтэ хүгжэмэй-гуманитарна лицейн һэльбэн шэнэлэлтын асуудалаар нүүдэл зүблөө үнгэргөө.
- Буряад Уласта Алас Дурнын тэдмэмжын объектнүүд булта баригдажа байна, юундэб гэхэдэ, Юрэнхылэгшэ бидэниие Алас Дурнын федеральна тойрогто оруулһан байна. Тэрэнэй ашаар, бидэ нэмэлтэ арга боломжонуудтай болообди. Ехэ юумэн хэгдэнэ, билэндэ ходо туһа үзүүлэгдэнэ. Иимэ хэмжээнэй дэмжэлгэ зандаа үлөө һаань, ехэ һайн бэлэй. Юундэб гэхэдэ, улас дотор хэгдэхэ юумэн ехэ байна. Тиимэһээ мүнөөдэрэй сэдэбтэ – Ородой Холбоото Уласай Конституцида заһабаринуудаар һанал үгэлгэдэ дахин бусажа, уласай ажаһуугшадта би хандаха байнам: заһабаринуудые дэмжэхыетнай гуйнаб. Хүдэлөөн хоёр талаһаа байха ёһотой: хэрбээ бидэниие дэмжэжэ байгаа һаань, бидэ баһа дэмжэлсэхэ ёһотойбди, - гэжэ Алексей Цыденов хэлээ.
Мүнөө дээрээ хотын һургуулинуудта эдеэ хоол бэлдэдэг комбинат болбосоролой 69эмхи зургаанудта туһаламжа үзүүлнэ, нэгэ халаанда 9 тонно бэлэн хоол ба кулинарна эдеэ бэлдэнэ, зүгөөр энэ байшанда 1993 онһоо ехэ заһабари хэгдээгүй юм.
Байгша ондо түрүүшын шатын ажалнууд эхилхэ. Байшанай хушалта һэлгэхэ, байшанай хана бүхэлхэ, байрануудай таһалгануудые шэнээр хэхэ, сонхо, үүдэ һэлгэхэ, байшан газаа талаһаа дулаалха ба нюур талыень гоё болгохо, лифт болон инженернэ түхеэрэмжэнүүдые һэлгэхэ болон бусад ажалнуудые дүүргэхээр түсэблэгдэнэ.
- Бүхы шэнэ түхеэрэмжэнүүд, бүхы ажалнууд Юрэнхылэгшын Алас Дурнын тэдхэмжын хэмжээндэ һомологдоно. Үнгэрэгшэ долоон хоногто комиссиин һүүлэй зүблөөндэ үшөө 70 сая түхэриг нэмэжэ үгтэһэн байна. Заһабарилгын бүхы ажалда 356 сая түхэриг хэрэгтэй, - гэжэ Буряад Уласай Толгойлогшо хэлээ.
Байгша оной һүүл болотор ажалнууд дүүргэгдэхөөр түсэблэгдэнэ. Мүнөө дээрээ проектын бэшэг баримтанууд заһагданхай, гүрэнэй талаһаа шалгалта хэгдээ, тус объектээр худалдаан бэлдэгдэнэ, тэрэнь байгша оной июль соо зарлагдаахаар түсэблэгдэнэ.
Автор: Бадмажаб ГЫНДЫНЦЫРЕНОВ
Фото: Анна ОГОРОДНИК
