Буряад Уласай Толгойлогшо баригдажа байһан хүгжэмэй-гуманитарна лицейдэ хүрэбэ

Эстетикын шэглэлтэй (уран зурагай, хореографииин) хэшээлнүүдые гүнзэгыгөөр үзэдэг Д. Аюшеевэй нэрэмжэтэ хүгжэмэй-гуманитарна лицейн байшан һэльбэн шэнэлэгдэнэ. Техническэ шэнжэлгын дүнгүүдээр болбосоролой эмхиин хуушан байшанииень задалха тухай шиидхэбэри абтаһан байгаа. Һууридань лицейн шэнэ байшан бодхоогдохо юм.

- Юрэнхы дээрээ аятай зохид болгохоһоо гадна, аюлгүйн ба газар хүдэлхэһөө хамгаалха асуудал гараһан байгаа. 200 сая түхэригһөө үлүүтэй мүнгэн һэльбэн шэнэлэлгэдэ һомологдоо, байгша оной декабрь һарада барилгын ажал дүүргэгдэхэ. Байшанай барилга дүүргэгдэжэ, тоногжуулагдаха юм. Удаань зүбшөөрэл абаха ажалнууд эхилхэ, гараха жэлэй эхиндэ лицей ажалаа эхилхэ, - гэжэ Алексей Цыденов дуулгаа.

Комсомольская, 29 гудамжада оршодог гурбан дабхар шэнэ байшанда хэшээлнүүдэй танхимууд, эмнэлгын кабинет, номой сан, спортзал, гардероб, трудай, гэр ажахы эрхилхэ танхимууд байха. Тиихэдэ хубсаһаа һэлгэхэ, бэеэ угааха газарнуудтай хатарай зал, хубсаһа оёхо болон уран дарханай мастерскойнууд хүдэлхэ. Мүнөө һуури табиха бетон ажалнууд, уһаар хангалгын, дулаагаар хангалгын, хэлхеэ холбооной сүлжээ холбоон байгуулагдана, подвалай хана бодхоогдоо, дулаалагдаа. Нэгэдэхи дабхарай барилгын ажал хэгдэнэ.

1-дэхи – 4-дэхи ангинуудуй һурагшадай һураха Комсомольская, 28а  гудамжаар оршодог лицейн хоёрдохи байшан һэльбэн шэнэлэгдэнэ. Эндэ хушалта, байшанай нюур тала һэлгэгдэхэ. Гэрэй орой задалха ажалнууд эхилэнхэй, байшанай нюур тала заһабарилга эхилхээр түсэблэгдэнэ.