420
Буряад Уласай Засагай газар болон «Селигдар» бүлгэм суг ажал ябуулха тухай хэлсээ баталба. Энэ хэлсээндэ Буряад Уласай Толгойлогшо Алексей Цыденов болон «Селигдар» бүлгэмэй юрэнхылэгшэ Костантин Бейрит гараа табиһан байна.
- «Селигдар» компани Буряад Уласта шэнжэлгын орёо ажал ябуулаа. Тэдэнэр руда шэнжэлжэ, олзоборилхо талаар арга боломжонуудые хураалаа. Мүнөө фабрика барилгын ажал дүүрэхэ тээшээ. Бүхыдөө 800 сая шахуу түхэриг һомологдоо. Шэнэ фабрикын ашаар, «Артель старателей Сининда-1» ажалай 250 һуури байгуулжа, 300-500 кг алта олзоборилхо юм. Фабрикын ажалай һуури бүхэндэ, тэдэнэй ажабайдал хангалгада аймаг дотор ажалай гурбан һуури байгуулагдаха. Аймагай байдал хубилха. Тиихэдэ эндэ оршон тойрон байгаалида хорото нүлөө үзүүлэнгүй, ашагта малтамал олзоборилогдодог юм, - гэжэ «Селигдар» бүлгэмэй юрэнхылэгшэ Константин Бейрит тэмдэглээ.
Буряад Уласай ниигэмэй-эдэй засагай хүгжэлтын һалбарида болон «Селигдар» бүлгэмэй мэдэлэй эмхинүүдтэ удаан болзорой ажалай харилсаа хүгжөөхэ тухай хэлсээндэ хэлэгдэнхэй. Мүнөө «Селигдар» бүлгэмэй «Артель старателей «Сининда-1» Хойто-Байгалай аймагта хүдэлнэ.
Хоёр талын хэлсэһэнэй ёһоор, «Селигдар» бүлгэм уласай ниигэмэй-эдэй засагай хүгжэлтын түсэлнүүд болон программануудые бэелүүлгэ, компаниин мүнгэ хүрэнгэ оруулалгын түсэлнүүдтэ хоёр талын ажал ябуулагдаха.
Мүнөө үйлэдбэридэ 200 мэргэжэлтэд хүдэлнэ. «Артель старателей Сининда-1» 2019 оной 104,6 сая түхэриг налог татабари түлэһэн байна.
Фото: Буряад Уласай Засагай газарай мэдээсэлэй албан
