394
Долоон жэлэй саана «Закамна» гэhэн хүдөө ажахын болбосоруулгын эд хэрэглэшэдэй нэгэдэл хээрын ургамалнуудай элдүүри эхилээ hэн. Харин 2018 ондо СПоКай түрүүлэгшэ Гомбо Эрдынеевай hанамжаар ажал ябуулга шэглэлээ hэлгээ. - Хээрын ургамал үйлэдбэрилхэ ажал ехэнхидээ сагай уларилай байдалhаа дулдыдана. 2019 ондо гүрэнэй туhаламжын ашаар мяха үүсэлэлгын цех баригдаа. Нэгэ үдэрэй туршада 5-7 толгой эбэртэ бодо мал үүсэлэгдэхэ түсэбтэй байгаа. Саашадаа үдэрэй туршада 15 толгой болотор нэмэгдэхэ хараатай. Бүхы хүсэ шадалаараа цех хүдэлөө hаа, жэлэй туршада 1500 толгой мал үүсэлхэ арга байха, - гэжэ “Закамна” СПоКай түрүүлэгшэ Гомбо Эрдынеев хөөрөө.
«Закамна», «Закамна-Агропродукт», «Шара-Азаргинский», «Борто», «Мэлын Баялиг» - табан СПоК нэгэдэжэ, “Дары Закамны” нэрэ доро бүхы эдеэ хоол, үйлэдбэрилһэн
бараагаа дурадхана. Тиихэдэ, 2019 оной декабрь hарада Хуртагын «Хурайн Адаг» болон Михайловкын «Баян Зүрхэн» СПоК энэ нэгэдэлэй бүридэлдэ ороо. Эдэ бүлгэмүүдтэ гүрэнэй 16,5 миллион түхэриг туһаламжа үгтөө.
СПоК бүхэн өөрын шэглэлээр ажалтай. Жэшээнь: «Закамна-Агропродукт» мяханай болон hүнэй зүйлнүүдые үйлэдбэрилжэ, аймагайнгаа зониие хангана.
- Мүнөөдэр Буряад Уласта хүдөөгэй хубиин ажахынуудые дэмжэлгэдэ болон нэгэдэлнүүдэй хүгжөөлгэдэ анхарал ехээр хандуулагдана. Иимэ ажахынуудые хамтын эмхинүүдтэ оруулха гол зорилготой. Хамтарал хадаа, хүдөөгэй хубиин ажахытанда гүрэнэй туhаламжа абаха, өөрынгөө ашаг олзоёо дээшэнь үргэхэ эгээл эдэбхитэй арга боломжо болоно. 2024 он болотор эдэ зорилгонуудые бэелүүлгэдэ 444,5 миллион түхэриг хараалагдана, - гэжэ Буряад Уласай Минсельхозпродай мэдээсэлгын түбэй хүтэлбэрилэгшын орлогшо Солбон Хобраков хэлээ.
