447
Буряад Уласай эдэй засагай сайдай орлогшоор - олзо оршын хорооной хүтэлбэрилэгшээр Виктор Михайлович Винокурцевов томилогдоо. Буряадай Засагай газарай тогтоолдо Уласай Толгойлогшо Алексей Цыденов гараа табиһан байна.
Винокурцев Виктор Михайлович 1981 оной сентябриин 21-дэ Загарай аймагай Загарай нютагта түрэһэн намтартай. 2002 ондо эрхимээр Буряадай тоололгын, экономикын ба мэдээсэлэй онол аргануудай колледж дүүргэһэн байна.
2009 ондо «Финансы и кредит» гэһэн мэргэжэлээр Эрхүү хотодо оршодог Сибириин экономикын болон эрхын академи эрхимээр дүүргэһэн юм. Үшөө оюутан байха үедээ ажаллажа эхилһэн. Загарайн аймагай Гүрэнэй эпидеомологиин хиналтын түбтэ ЭВМ-эй оператораар ажалайнгаа намтар эхилээ.
2004 онһоо Загарай аймагай захиргаанда нэгэдэхи шатын мэргэжэлтэнээр ажаллажа эхилээд, яба ябаһаар мүнгэ тоололгын хүтэлбэриин бюджедэй таһагай ахалагша мэргэжэлтэн болотороо ургаа.
2012 ондо Буряадай эдэй засагай яаманай налогой олзын түсэблэлгын таһагай хэлсэгшээр ажаллажа эхилээ. 2013 ондо Буряадай эдэй засагай яаманай хорооной түрүүлэгшын орлогшо - налогой олзын түсэблэлгын таһагай даргаар томилогдоо.
Теэд Буряадай эдэй засагай хүгжэлтэдэ хэр зэргэ нүлөөлхэб саг харуулха бэзэ. Олзын хэрэг эрхилэгшэд, томо түсэнүудые бэелүүлһэн уладууд үнэн байдал һайн мэдэхэ зон Буряадайнгаа эдэй засагай дарганар болохоёо юундэ шармайнагүй гээшэб?
Автор: Эрдэни РАДНАЕВ
Фото: Буряад Уласай Засагай газар
