265
Аяншалга хүгжөөхэ талаар 22 түсэл Буряадта һаяын һара жэлнүүдтэ бэелүүлэгдэхэнь. Тэдэ Ростуризмын эмхидхэһэн грантда хүртөө. Баяртай мэдээсэл Буряад Уласай аяншалгын талаар яаман мэдүүлнэ.
Ород гүрэнэй засаг газар өөрын захиралаар 2020 оной сентябрь һарада аяншалга хүгжөөлгэдэ 1,2 миллиард түхэриг дамжуулха гэһэн шиидхэбэри абаһан байна. Тиимэһээ грантын урилдаа Ростуризм удангүй эмхидхээ. Оройдоол хоёр долоон хоногой хугасаада бүхы гүрэн доторһоо аяар 4061 түсэл үгтөө. Тус урилдаанда хабаадаха тухай Буряад Уласһаа 67 мэдүүлгэ ороо. Өөрын хэрэг бүтээхын түлөө 22-ынь грантын ашаар 62 сая 552 мянга 072 түхэриг дэмжэлгэ абаха болонхой.
7 түсэл Түнхэн аймагта бэелүүлэгдэхэ гээд хэлэхэ хэрэгтэй. “Түнхэнэй гол” гэһэн аяншалгын рекреационно кластерай дэргэдэ тэдэ ородог юм. “Саянай марал” гэһэн түсэлэй ёһоор, мүнөө жэлдэ байгуулагдаһан Алтайһаа асарагдаһан бугын фермын дэргэдэ багахан долоон гэр байра баригдахаар хараалагданхай. Хүн зон тэндэ амархадаа, шуһан эбэрээрнь бэеэ аргалуулха юм.
Аршан һууринда велосипедээр, ябагаар, санаар ябаха зүргэнүүд бэлдэгдэхэ ёһотой. Мүн тиихэдэ “Саяан” курортын байшааниие эрэмдэг бэетэй хүн зоной hаадгүй ябаха болгохо түсэл һонирхол татана.
Байгал шадархи аймагта “Байгалай эрье” гэһэн газарта табан тусхай глэмпионгын һууринуудые бодхоохо талаар түсэлдэ гүрэнэй грантын туһаламжа үзүүлэгдэхэ болоно.
“Горячинск” курортдо “Нерпа” гэһэн концертнэ киногой зал заһабарилгада мүнгэн хүртэхэ. “Гранд Юрта”, “Меркитская крепость”, сэгээгээр эмнэлгэ болон бусад һонирхолтой түсэлнүүд Буряадтамнай бэелүүлэгдэхэ.
Грант шүүгшэд жэлэй түгэсэтэр Ростуризмтай тусхай хэлсээ баталжа, мүнгөө абаха аргатай.
Автор: Борис БАЛДАНОВ
