​Буряад Уласта хүдөө ажахын hалбарида hуралсал үнгэрнэ

Буряад Уласта хүдөө ажахын hалбарида олзын хэрэг эрхилхэ уладуудта тусхай hурасал үнгэргэгдэхэнь. Хүдөө ажахын hалбарида hүүлэй сагта хүнүүд харасаяа табинхайнууд. Олон нютагуудта залуушуул бусажа ерэнэ. Теэд гол түлэб адуу мал үдхэхэ зорилго табижа, гүрэнэй дурадхаhан программануудта хабаадажа, субсидиин мүнгэндэ хүртэнэ. Харин эбэртэ бодо малаа олон болгоод, тэрэнэйнгээ мяха шүлыень яагаад олзотойгоор болбосоруулхаб гэhэн асуудал олониие гайхуулна. Буряадай хүдөө ажахын болон эдеэ хоолой яаман Уласай мэдээсэлэй түбтэй хамта тусхай hургалгын семинарнуудые үнгэргэхэ гэжэ хэлсээ. Ноябриин 13-да мал үүсэлжэ, нэгэдэхи шатын болбосоруулга, үүсэлэлгын үедэ ветеринарнуудай талаhаа ямар дансанууд хэрэгтэйб, мал худалдан абахадаа ямар талануудтань анхарал хандуулхаб гэhэн сэдэбүүдээр хөөрэлдөөн үнгэрөө.

Һануулан хэлэбэл, Улас доторнай эршэтэйгээр мяханай үүлтэрэй мал үдхэдэг ажахынууд олон. Тэрэнь мэдээтэй, мяханай мал hүнэй малда ороходоо, адуулганиинь нэгэ бага хүнгэн. Хальмаг, казах үүлтэрэй мал өөhэдөө бэлшээд, бэень түргөөр ургадаг юм. Һайн бэлшээридэ байбал хахад жэлэй туршада 200 кг хүрэтэр мяха ургуулха аргатай. Үшөө тиихэдэ амтанай талаар мяхан шэмэтэй, хүн зон ехэ дуратайгаар худалдан абадаг. Тиимэhээ болбосоруулга бүтээжэ, жэшээлхэдэ, хүргэhэн мяха бусад регионуудаар наймаалхада тааруу байна. Буряадаймнай тала дайда шэмэ шүүhэтэй ногоогоор элбэг, тиимэhээ мал атаржан бэлшэжэ ехэ амтатай мяхатай. Тэрэнээ бидэ тон хэрэгтэйгээр хэрэглэжэ шадаха ёhотойбди гэжэ Буряадй Засаг газарай Түрүүлэгшын орлогшо, хүдөө ажахын болон эдеэ хоолой сайд Даба-Жалсан Чирипов хэлэнэ hэн.