​«Бодолнуудаа бэелүүлхэ саг» түсэл Буряадта бэелүүлэгдэнэ

"Время твоих идей" гэhэн түсэл Буряадай үйлэдбэриин, эдэй засагай  яаманууд, бизнес-инкубатор болон "Мой бизнес" түбэй ашаар бэелүүлэгдэжэ,  олзын хэрэг эхилжэ байhан эрхилэгшэдые дэмжэнэ. Эдэ үдэрнүүдтэ 10 түсэл  шэнжэлэгшэдэй анхаралда дурадхагдаа.

Олзын хэрэг эрхилэгшэд түсэлэйнгөө багахан хэhэг дурадхана. Тэдэнэй нэгэн хадаа эмшэдэй ажалай hуури автоматизированна болгоохо арга харуулагдана. Энэ аргаар нэгэдэмэл түхэл зохёогдожо, шэнжэлгын ажал алишье талаhаа урагшатай мүн хүнгэн болгохо зорилготой. Жэшээнь, онлайн ээлжээндэ бэшэгдэhэн зоной мүн регистратурын ажал шүүмжэлэгдэжэ, эмшэдэй ажалда туhатай болохо зэргэтэй гэжэ "Байкалмедсистемс" эмхиин түлөөлэгшэ  Мунко Раднаев хэлэбэ.

"Время твоих идей" түсэл - мүрысөөн бэшэ.  Энэ хадаа залуу эрдэмтэдэй зохёоhон онол арга элдэб hалбаринуудта хэрэглэхын тула бэелүүлэгдэнэ. Тиигэжэ энэ зохёолгые үргэнөөр нэбтэрүүлхын тула инвестици гү, али гүрэнэй тэдхэмжэдэ хүртэхэ аргатай.

Ноябриин 20-до түгэсхэлэй шата болохо гэжэ уласай бизнес-инкубаторай захирал Александр Жигжитов хэлэбэ. Мүнөө 10 түсэл шэлэн абтанхай, эдэ хэд бэ гэбэл: венчурна жасын, дүршэлтэй олзын хэрэг эрхилэгшэд, гүйсэдхэхы засагай түлөөлэгшэд болоно ха. Дурадхагдаhан проектнуудай удха шанар баhал үргэн: хубсаhа оехоhоо эхилээд эрдэмтэдэй нэбтэрүүлгэнүүд хүрэтэр. Тиин инновациин жасын тэдхэмжэдэ эдэнэй олонхинь хүртэнхэй байна: тодорхойлбол, 500 мянганhаа  хэдэн сая түхэриг болотор.  Мүнгэнэй тэдхэмжэhээ гадна бизнес- зүбшэл байха аргатай мүн лэ харилсаанай, худалдаанай талаар харгы бэдэрэлгэдэ туhатай байха ха. Мэргэжэлтэ шүүбэришэд проект бүхэндэ өөрынгөө сэгнэлтэ, hанамжа хэлэжэ, дэмжэхэ үгыгөө мэдүүлхэ. Проектнуудые уласай шэнжэлэгшэдhээ гадна, Сколково мүн Нью-Йоркоhоо сэгнэхэ юм.  Хабаадахын тула уласай бизнес-инкубаторай сайт дээрэ мэдүүлгэ оруулагдаха ёһотой.