529
Улаан-Үдэдэ гурбадахи хүүргын барилгада федеральна бюджетһээ нэмэлтэ 1,8 миллиард түхэриг һомологдохо. Тиигэжэ 2021 ондо бүхыдөө һомологдохо мүнгэнэй хэмжээн 2 миллиард түхэригһөө дээшэ болохо юм.
Мүнөөдэрэй байдалаар үглөө, үдэшэниинь Элеватор, Бабушкинай үйлсэдэ болон Автомобилистнүүдэй гудамжада тон олоор автомашинанууд сугларна. Энэ бүглэрэл усадхаха зорилготойгоор гурбадахи хүүргэ баригдана. Хүүргын утань - 202 метр, үргэниинь – 26 метр.
- Үдэ гол дээгүүр хүүргэ барилга болон Сахьяновагай болон Транспортная гудамжануудай уулзуурай Транссибирскэ магистраль барилгада 2021 ондо 210 сая түхэриг хэрэгтэй. Энэ мүнгөөр газарнуудые худалдан абажа, һужаануудые шэнээр татаха гэжэ түсэблэгдэһэн байгаа. Мүнөө Ородой Холбоото Уласай транспортын яаман 1,8 миллиард түхэриг һомолхо, тиимэһээ Үдэ гол дээгүүр хүүргэ бариха ажалай нэгэ шатыень эхилхэ түсэбтэйбди. Тиигэжэ барилгын болзоршье богони болохо, - гэжэ Буряад Уласай Засагай газарай Түрүүлэгшын хангалгын байгууламжа хүгжөөхэ талаар орлогшо Евгений Луковников хэлэбэ.
«Аюулгүй, һайн шанартай автомобилиин харгынууд» гэһэн үндэһэн түсэлэй хэмжээндэ Ородой Холбоото Уласай Юрэнхылэгшэ Владимир Путинай даабаряар барилга ябуулагдана. 2020 оной март һарада «Хотьковский мост» бүлгэм барилгын ажал эхилжэ, 2024 ондо дүүргэхээр түсэблэгдэнэ. Барилгын ажалда бүхыдөө 7,5 миллиард гаргашалагдаха юм.
Фото: Буряад Уласай барилгын яаманай мэдээсэлэй албан
