462
Байгша оной январиин 31-дэ Захааминай аймагай Холтоһон болон Мэлэ нютагуудта интернет хүрэжэ ерэбэ. Холтоһон нютагай 800 гаран ажаһуугшад, Мэлын 600 хүн одоошье түргэн интернет, сотово холбоотой болоһондоо баяртай.
Һүүлэй хэдэн жэлэй туршада холын хүдөө нютагуудта интернет оптико-волокногай аргаар татагдана. Захааминай аймагай баруун хойто зүгэй дүрбэн нютагуудай нэгэн - Мэлэдэ «Т2 Мобайл», анхан Теле 2 гэжэ нэрлэгдэдэг бүлгэм эдэ үдэрнүүдтэ сотово холбооной баазануудые тогтоожо, 2,3,4 Джи түхэлэй холбоон, интернет дамжуулагдаба.
Мэлэ нютагай зон үни һайн шанартай холбоо хүлеэжэ, шэнэ түхэлэй, хурдан интернедтэй болоһондоо баяртай. Хүүгэд үглөөгүүр бодоод, интернет бии гү гэжэ һанаа зобоно. Хоёр үдэрэй туршада олон тоото наадануудые телефоноор наадажа, кинонуудые хаража эхилхэдэнь түрэлхид һанаата болонхой.
Мүнөө гэртээ, ажалдаа һуугаад, ехэнхи ажалаа бүри эршэмтэйгээр ябуулха арга олгогдоо. Бүхы ажалай тоосоо, баримтануудые түргэн интернедээр Закаменск хото эльгээжэ эхилээбди. Тэрээнһээ урид али нэгэн хэрэг гарахадань аймагай түб ошожо, бүхэли үдэрөө бараха саг ерэдэг байгаа», - гээд Мэлын Соёлой байшанай захирал Татьяна Бадмаева хэлэнэ.
Захааминай хоёр нютагта интернет хүрэжэ ерэбэ. Удаадахи ээлжээндэ Сагаан-Морин нютаг оруулагданхай. Нютагай гулваа Гарма Шагдуров мүнөө гар утаһанай холбоон, интернет үгы байхада ехэ муу гэжэ онсолно:
Нютагайнгаа урда талада, горхоной хажууда үдэр бүхэндэ ерэжэ, сотово утаһанай холбоо бэдэрхэш. Энэ тэрэ шухала хэрэгэй гараа һаа, ехэ хүндэ байдаг. Тиибэшье байгша оной июль, август һарануудай туршада манай нютагта интернет одоошье хүрэжэ ерэхээр хүлеэгдэнэ».
Фото: egov-buryatia.ru/mintrans
