Агаарай онгосоор ябаха сэн ехэ хүнгэлэлтэтэй болгогдобо

  Алас Дурна тойрогто ажаһуугша хүн бүхэн самолёдоор хүнгэлтэтэйгөөр ниидэхэ аргатай болобо. Ород Уласай Засагай Газарай түрүүлэгшэ Михаил Мишустин Алас Дурнаһаа Москва, Санкт-Петербург хүрэтэр болон һөөрөө ниидэхэ 21 маршрудта субсиди  үзүүлхэ тухай тогтоол баталба. Тэрэнэй ёһоор Алас Дурнын тойрогто ородог можо нютагуудай ажаһуугшад гүрэнэй субсидидэ хүртэһэн рейснүүдээр ниидэхэ аргатай болобо. Москва хүрэтэр ниидэхэ маршрудта Магадан, Южно-Сахалинск, Хабаровск, Владивосток, Петропавловск-Камчатский, Анадырь, Благовещенск, Мирный, Нерюнгри, Певек, полярный, Улаан-Үдэ, Шэтэ, Якутск хотонууд оруулагдаа. Алас Дурнын ажаһуугшадай дунда эгээл энэ маршрут тон эрилтэтэй байна. Буряадай толгойлогшо Алексей Цыденовай хэлэһээр эндэ наһанай илгаа байхагүй:

Анхан хүнгэлэлтэтэй билет 23 наһа хүрөөдүй болон 55-60 наһанһаа аха зондо үгтэдэг байһан гээд һануулая. Мүнөө программа бэелүүлэгдэжэ эхилбэ, тобшолол хэхэнь эртэ", -  гэжэ толгойлогшо тэмдэглэнэ. 

Шэнэ тогтоолой ёһоор 2021 ондо 5 миллиард түхэриг субсидидэ һомологдохо болоо. Тиигэжэ 450 мянган хүн хүнгэлэлтэтэй сэнгээр билет абажа, дээрэ тоологдоһон хото можо ошохо аргатай болобо. Үшөө 5,8 миллиард түхэриг тусхайта хүнгэлэлтэнүүдтэ хүртэхэ эрхэтэй зоной самолёдоор ниидэхэ хэрэгтэ Ород Уласай һанһаа һомологдобо.