​Үбэлэй Байгалда аяншалагшад бууба

Гарагай 1-эй үдэр «Байкал» аэропорт үбэлэй Байгалда аяншалха программаар Екатеринбург, Москва хотонуудһаа хоёр рейсээр ерэһэн аяншалагшадые угтаба.

Үбэлэй Байгалда аяншалха чартерна программа Аяншалгын талаар федеральна агентство, Буряадай Засагай газар, TUI Россия гэһэн туроператор болон Уласай яашалгын компанинуудтай хамта байгуулагдаа. Тус программын ашаар Екатеринбург хотын ажаһуугшад Буряад Улас сэхэ рейсээр ерэхэ аргатай болоо.

- Гүрэн дотороо аяншалга хүгжөөлгэ хадаа гол зорилгомнай болоно. Аяншалгын кэшбек болон ондоо шэглэлнүүдээр аяншалга эмхидхэхэ программаяа үргэдхэхэбди. Үнгэрһэн жэлэй дүршэлөөр харахада, чартераар ябахада, сэн бага болоно. Байгша оной программа үбэлэй Байгалһаа эхилнэ, - гэжэ Аяншалгын талаар федеральна агентствын хүтэлбэрилэгшэ Зарина Догузова хэлэбэ.

TUI Россия эмхиин захирал Тарас Демура гэгшын хэлэһээр, найман үдэрэй амаралта Екатеринбург хотын ажаһуугшадта – хүнэй 18 мянган түхэригһөө, Москва хотын ажаһуугшадта хүнэй 24 мянган түхэргһөө дээшэ болохо юм.

 «Уральские авиалинии» авикомпаниин чартерна рейсүүд Москва, Екатеринбург хотонуудһаа гарагай долоон бүхэндэ субботодо ниидэхэ. Мартын дүүрэтэр тус программа бэелүүлэгдэхэ

 Аяншалагшад Ивалгын дасан хүрэхэ, «Талын нүүдэлшэн» этнокомплексдо буряадуудай, тиихэдэ шэмээшэгүүдэй ажабайдалтай танилсаха. Тэдэнэр заатагүй Байгал далай хүрэхэ юм.